গোলাঘাট, 25 নৱেম্বৰঃ গোলাঘাটত অব্যাহত আছে হাতী মানুহৰ সংঘাত ৷ বন্যহস্তীৰ পৰা পৰিত্ৰাণ পাবলৈ কৃষকৰ ভয়ংকৰ পদক্ষেপ ৷ তাঁৰত বিদ্যুৎ সংযোগ কৰি হাতীৰ গতিপথ সলনি কৰিবৰ বাবে একাংশ লোকে তৈয়াৰ কৰিছে বৈদ্যুতিক ফেন্সিং ৷
উল্লেখ্য যে,কেইমাহমান পূৰ্বে গোলাঘাটত এডাল বিদ্যুতৰ তাঁৰত লাগি মৃত্যু হৈছিল বনৰীয়া হাতীৰ। গোলাঘাট মুৰফুলনী খণ্ড বন কাৰ্যালয়ৰ অধীনস্থ গোলাঘাট কাৰ্বিআংলং সীমান্তত সেই একেই ভয়াৱহ ঘটনাৰ পুনৰাবৃত্তি হোৱাৰ আশংকা দেখা গৈছে । কাৰণ গোলাঘাট কাৰ্বিআংলং সীমান্তত এতিয়া বন্য হস্তীৰ গতিপথ সলনি কৰিবৰ বাবে একাংশ হৃদয়হীন লোকে ৰাতি হ'লেই বিদ্যুৎ সংযোগ কৰি থয় এডাল তাঁৰত। বন্যহস্তী অহা যোৱা কৰা পথ আৰু নিজ বাসগৃহৰ চাৰিওফালে বন্যহস্তীৰ গতিপথ সলাবলৈ এডাল বিদ্যুতৰ তাঁৰ স্থাপন কৰে ৷ নিশাৰ ভাগত প্ৰত্যেকটো পৰিয়ালৰ বাসগৃহ আৰু কৃষি ভূমিৰ চাৰিওফালে স্থাপন কৰি থোৱা এডাল তাঁৰত বিদ্যুৎ সংযোগ কৰি থয়। কিন্তু হাতী অহাযোৱা কৰা পথত এনেদৰে তাঁৰ স্থাপন কৰি বন্য হস্তীৰ বাবে বিপদ নমাই আনিব খোজা দেখিও বনবিভাগে কোনোধৰণৰ পদক্ষেপ গ্ৰহণ নকৰাটো আশ্বৰ্যকৰ। যাৰ বাবে এতিয়া গোলাঘাটত পুনৰ বন্য হস্তীৰ মৃত্যুৰ আশংকা কৰিছে সচেতন নাগৰিকে।
