কয়লা ছিণ্ডিকেটঃ আৰক্ষীৰ বিৰুদ্ধে আৰক্ষী

এইবাৰ আৰক্ষীৰ বিৰুদ্ধে কঠোৰ স্থিতি গোলাঘাট আৰক্ষীৰ । গোলাঘাটৰ কোনো আৰক্ষী লোক যদি অবৈধ কয়লা সৰবৰাহ কাৰ্যত জড়িত থাকে তেন্তে তেওঁৰ বিৰুদ্ধে শাস্তিমূলক ব্যৱস্থা লোৱাৰ ঘোষণা ।

গোলাঘাট, 14 অক্টোবৰঃ ৰাজ্যত চলি অহা অবৈধ কয়লা ছিণ্ডিকেটক লৈ গোলাঘাট আৰক্ষীৰ নতুন মোৰ ৷ যদিহে কোনো আৰক্ষীৰ লোক কয়লা ছিণ্ডিকেট নাইবা অবৈধ কয়লা সৰবৰাহৰ লগত জড়িত থকাৰ প্ৰমাণ লাভ কৰে তেতিয়াহ'লে শাস্তিমুলক ব্যৱস্থা গ্ৰহণৰ আশ্বাস আৰক্ষী অধীক্ষক পুস্পৰাজ সিঙৰ ৷

গোলাঘাট জিলাৰ মাজেৰে দীৰ্ঘদিন ধৰি চলি আহিছে কয়লাৰ চোৰাং বেহা ৷ অভিযোগ অনুসৰি একাংশ অসাধু ব্যৱসায়ীয়ে আৰক্ষীৰে সৈতে মিলি চলাই গৈছে এই ব্যৱসায় ৷ জিলাখনৰ মাজেৰে নিতৌ সৰবৰাহ হোৱা অবৈধ কয়লাভৰ্তি ট্ৰাক মাজে সময়ে আৰক্ষীয়ে জব্দ কৰে যদিও পৰৱৰ্তী সময়ত এইসমূহ ট্ৰাক মুকলি কৰি দিয়ে ৷

কিছুদিন পূৰ্বে দেৰগাঁৱৰ 37নং ৰাষ্ট্ৰীয় ঘাইপথৰ পৰা আৰক্ষীয়ে জব্দ কৰিছিল 5খনকৈ কয়লাভৰ্তি ট্ৰাক ৷ AS 01 BC 9574, AS 01 BC 9274, AS 01 BC 3674 AS 09 C 3186 আৰু AS 19 C 0911 নম্বৰৰ ট্ৰাককেইখন জব্দ কৰিছিল আৰক্ষীয়ে ৷ শিৱসাগৰ জিলাৰ নাগিনীমৰাৰ পৰা কাৰ্বি আংলং জিলাৰ খটখটীলৈ কয়লা কঢ়িয়াই আনি থকা অৱস্থাত আৰক্ষীয়ে জব্দ কৰিছিল ট্ৰাককেইখন ৷

আৰক্ষীৰ বিৰুদ্ধে উত্থাপিত অভিযোগ অনুসৰি, এনে কয়লাৰ ব্যৱসায় চলাই যোৱাত দীৰ্ঘদিন ধৰি আৰক্ষীয়ে সহযোগিতা আগবঢ়াই আছে ৷ অবৈধ আৰু চোৰাং ব্যৱসায়ীৰ পৰা উৎকোচ লৈ আৰক্ষীয়ে চলাই গৈছে অবৈধ ব্যৱসায় ৷ ঘটনা সন্দৰ্ভত গোলাঘাট জিলাৰ আৰক্ষী অধীক্ষক পুস্পৰাজ সিঙক সাংবাদিকে প্ৰশ্ন সোধাত এনেকুৱা ঘটনা তথ্য-প্ৰমাণসহ পোহৰলৈ আহিলে শাস্তিমুলক ব্যৱস্থা গ্ৰহণ কৰিব বুলি জনায় সিঙে ৷