বোকাখাত, 5 নৱেম্বৰ : দীপাৱলীৰ সন্ধিয়া ভাগত নুমলীগড়ৰ কমাৰগাঁও আৰক্ষী থানাৰ অন্তৰ্গত মহুৰামুখ 1 নং গৰৈমাৰী গাঁৱত সংঘটিত হৈছে এক মাৰপিটৰ ঘটনা ৷ মাৰপিটৰ ঘটনাত মৃত্যুক সাৱটিবলগীয়া হয় এজন যুৱকে ৷ জানিব পৰা মতে, সীমান্ত হাজৰিকা নামৰ এজন যুৱকে তেওঁৰ দোকানৰ সমীপতে দোকান বহুওৱা আন এজন মাছ বেপাৰীক মাৰপিট কৰে ৷
ইয়াৰ পাচতে অঞ্চলটোৰ একাংশ পুৰুষ-মহিলাই উত্তেজিত হৈ সীমান্ত হাজৰিকাৰ দোকানখন ভাঙি লণ্ডভণ্ড কৰে । ঘটনাস্থলীত কমাৰগাঁও আৰক্ষী(Kamargaon Police) উপস্থিত হৈ পৰিস্থিতি নিয়ন্ত্ৰণ কৰিবলৈ চেষ্টা অব্যাহত ৰখাৰ সময়তে পুনৰ অঞ্চলটোত উত্তেজনা বৃদ্ধি পায় ৷
যাৰ ফলস্বৰূপে কমাৰগাঁও আৰক্ষীয়ে খুমটাই, দেৰগাঁও, বোকাখাত আৰক্ষীৰ সহায় বিচাৰি যোগাযোগ কৰে । থানাকেইখনৰ আৰক্ষী ঘটনাস্থলীত উপস্থিত হোৱাৰ উপৰিও বোকাখাত মহকুমাৰ দণ্ডাধীশ উপস্থিত হৈ অৱশেষত পৰিস্থিতি নিয়ন্ত্ৰণ কৰিবলৈ সক্ষম হয় ৷ কিন্তু দুৰ্ভাগ্যজনকভাৱে কিছু সময়ৰ পাচত সীমান্ত হাজৰিকাৰ মৃতদেহ ওচৰৰে এটা পৰিত্যক্ত পুখুৰীত উদ্ধাৰ কৰে আৰক্ষীৰ এটা দলে ।
পুখুৰীটোত পৰি কিদৰে যুৱকজনৰ মৃত্যু হ’ল, সেয়া বৰ্তমানলৈকে জানিব পৰা হোৱা নাই ৷ সীমান্তৰ মৃতদেহত আঘাতৰ চিন স্পষ্ট হৈ পৰিছে । ইতিমধ্যে মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে গোলাঘাটলৈ প্ৰেৰণ কৰিছে আৰক্ষীয়ে । লগতে ঘটনা সন্দৰ্ভত অনুসন্ধান অব্যাহত ৰাখিছে তদন্তকাৰী আৰক্ষীয়ে । ইফালে উক্ত ঘটনাক লৈ এতিয়াও গাঁওখনত উত্তপ্ত পৰিৱেশে বিৰাজ কৰা পৰিলক্ষিত হৈছে ৷
লগতে পঢ়ক : দীপাৱালীৰ উছাহৰ মাজতে ভয়াৱহ অগ্নিকাণ্ড
