"অতিকে চেনেহৰ মুগাৰে মহুৰা, তাতোকৈ চেনেহৰ মাকো, তাতোতকৈ চেনেহৰ বহাগৰ বিহুটি নাপাতি কেনেকৈ থাকো " । অসমীয়া জাতিৰ প্ৰাণৰ উৎসৱ বিহুক লৈ এতিয়াব্যস্ত অসমবাসী । প্ৰকৃতিৰ বুকুত বৰদৈচিলাৰ আগমণৰ লগে-লগে গছৰ ডালত কুলি-কেতেকীৰ সুৱলা মাতে বিহুবলীয়া অসমবাসীক বলিয়া কৰি তুলিছে ।
ৰঙালী বিহুৰ ব্যাপক প্ৰস্তুতি ধনশিৰি মহকুমাৰ নাঁওজানত ৰাজ্যৰ ভিন্ন প্ৰান্তৰ দৰে ধনশিৰি মহকুমাৰ নাঁওজানবাসীও বিহুক আদৰাৰ বাবে পূৰ্ণৰূপত প্ৰস্তুতি আৰম্ভ কৰিছে । হেপাহৰ ৰঙালী বিহুটিক আদৰিবলৈ গাভৰুসকলে তাঁতশালত আপোনজনৰ বাবে চেনেহৰ গামোছা লগোৱাৰ উপৰিও পিঠা পনা আদি বনোৱাৰ বাবেও প্ৰস্তুতি চলাইছে । শনিবাৰে ই.টি.ভি.ভাৰতৰ সাংবাদিক ধনশিৰি মহকুমাৰ নাওজানত বিহুৰ প্ৰস্তুতিৰ বাতৰি সম্প্ৰচাৰৰ বাবে উপস্থিত হোৱা সময়ত ঢুলীয়াৰ ঢোলৰ মাতত আপোন পাহৰা হৈ নাচনীসকলে এপাক নাচিবলৈ আহত জুপিৰ তলত লৌৰি-ধাপৰি অহাৰ ছবি পৰিলক্ষিত হয় ।
