তথ্য দিব পাৰিলে তদন্ত চলিব গুৰুজ্যোতিৰ আত্মীয়ৰ বিৰুদ্ধে

ৰমেন ডেকা আৰু অতুল বৰাৰ অভিযোগৰ পিচতেই দুয়োগৰাকী নেতাক উপযুক্ত তথ্য প্ৰদান কৰিবলৈ আহ্বান জনাইছে অসম লোকসেৱা আয়োগৰ তদন্তকাৰী বিষয়া তথা গোলাঘাট জিলাৰ অতিৰিক্ত আৰক্ষী অধীক্ষক সুৰজিত সিং পানেচৰে ৷

গোলাঘাট, 29 জুনঃ অসম লোকসেৱা আয়োগৰ কেলেংকাৰীত বিধায়ক গুৰুজ্যোতি দাসৰ নাম সাঙোৰ খাই পৰাৰ পিচতেই ইটিভি ভাৰত অসমৰ আগত প্ৰতিক্ৰিয়া প্ৰকাশ কৰিছে গোচৰটোৰ তদন্তকাৰী বিষয়া সুৰজিত সিং পানেচৰে ৷

শেহতীয়াকৈ বিধায়ক গুৰুজ্যোতি দাসৰ পৰিয়ালৰ পাঁচজনকৈ সদস্যই কিদৰে লোকসেৱা আয়োগৰ পৰীক্ষাত উত্তীৰ্ণ হ'বলৈ পালে তাক লৈ প্ৰশ্ন উত্থাপন কৰিছিল বিজেপি নেতা ৰমেন ডেকা আৰু অতুল বৰাই এই বিষয়টো তদন্তলৈ আনিব লাগে বুলি দাবী উত্থাপন কৰিছিল ৷ কিন্তু তদন্তকাৰী বিষয়া পানেচৰে সকলোৰে বহী পৰীক্ষা সম্পন্ন হোৱাৰ লগতে কোনোধৰণৰ বিসংগতি নথকাৰ কথা উল্লেখ কৰে ৷ অৱশ্যে যদিহে ৰমেন ডেকা আৰু অতুল বৰাৰ হাতত অন্য কিবা তথ্য আছে সেয়া আৰক্ষীক প্ৰদান কৰিলে বিষয়টো সন্দৰ্ভত গুৰুত্ব দিয়াৰ লগতে দোষীয়ে শাস্তি পাব বুলি উল্লেখ কৰে পানেচৰে ৷