গোলাঘাট, 4 ডিচেম্বৰ : গোলাঘাট ক্ৰীড়া সন্থাৰ খেলপথাৰত প্ৰথমবাৰৰ বাবে আৰম্ভ হৈছে সদৌ ভাৰত গোলাঘাট জিলা ক্ৰীড়া সন্থা আমন্ত্ৰণমূলক নৈশ ফুটবল প্ৰতিযোগিতা ৷ দেওবাৰে নিশা প্ৰতিযোগিতাৰ শুভাৰম্ভ কৰা হয় ৷ আনহাতে গোলাঘাট ভাৰত ফুটবল ফেডাৰেচনৰ পতাকা উত্তোলন কৰে শান্তনু পূজাৰীয়ে, অসম ফুটবল সন্থাৰ পতাকা উত্তোলন কৰে চাংগাম ব্ৰহ্মই আৰু জিলা ক্ৰীড়া সন্থাৰ পতাকা উত্তোলন কৰে ডঃ অজিত বৰুৱাই ৷
ইয়াৰ পাছতে নুমলীগড় তেল শোধনাগাৰৰ সামাজিক দায়ৱদ্ধতা বিভাগৰ তৰফৰ পৰা গোলাঘাট ক্ৰীড়া সন্থালৈ আগবঢ়োৱা ফ্লাইড লাইট মুকলি কৰে শোধনাগাৰৰ পৰিচালন সঞ্চালক ভাস্কৰ জ্যোতি ফুকনে ৷ ইফালে প্ৰতিযোগিতাৰ উদ্বোধনী মেচখন অনুষ্ঠিত হয় হৰিচিঙা এফ চি অসম আৰু মণিপুৰ একাদশৰ মাজত ৷ মেচৰ পূৰ্বে গোলাঘাটৰ সৰ্বানন্দ চলিহা সংগীত মহাবিদ্যালয়ৰ কণ কণ শিশুসকলে নৃত্য প্ৰদৰ্শন কৰে ৷
আনহাতে, 7 দিনীয়াকৈ অনুষ্ঠিত হ’বলগীয়া প্ৰতিযোগিতাখনত 8 টাকৈ দলে অংশগ্ৰহণ কৰিছে বুলি জানিবলৈ দিছে গোলাঘাট জিলা ক্ৰীড়া সন্থাৰ সম্পাদক সঞ্জীৱ সন্দিকৈয়ে ৷ তেওঁ কয় যে, ‘‘মণিপুৰৰ দুটা, নাগালেণ্ডৰ দুটা, বড়োলেণ্ডৰ তিনিটা আৰু লাজং দলে অংশগ্ৰহণ কৰিছে ৷ আমি প্ৰথমবাৰ বাবে এই প্ৰতিযোগিতা আয়োজন কৰিছো ৷ গোলাঘাটবাসীৰ বিপুল সঁহাৰি লাভ কৰিছো ৷ এই উৎসাহৰ বাবে খেলুৱৈসকলেও যথেষ্ট উপকৃত হ’ব ৷’’
তেওঁ কয়, ‘‘আমাৰ খেলপথাৰ নাছিল ৷ কিন্তু গোলাঘাটবাসী ৰাইজৰ মৰম আৰু সহযোগিতাৰ বাবে এই খেল আয়োজন কৰাত সফল হৈছো ৷ এই ক্ষেত্ৰত জিলা ক্ৰীড়া সন্থাৰ বিষয়ববীয়াৰ যথেষ্ট কষ্টৰ বিনিময়ত আৰু নুমলীগড় তেল শোধনাগাৰ সহযোগত এই প্ৰতিযোগিতা আয়োজন কৰিবলৈ সক্ষম হৈছো ৷
উদ্বোধনী অনুষ্ঠানত উপস্থিত আছিল সৰুপথাৰৰ বিধায়ক বিশ্বজিৎ ফুকন, নুমলীগড় তেল শোধনাগাৰৰ সামাজিক দায়ৱদ্ধতা বিভাগৰ মুখ্য মহা প্ৰৱন্ধক কাজল শইকীয়া, জিলা আৰক্ষী অধীক্ষক ৰাজেন সিঙৰ লগতে কেইবাজনো বিশিষ্ট ব্যক্তি ৷
লগতে পঢ়ক : ভালুকৰ সন্ধানত বন বিভাগৰ তীব্ৰ অভিযান
