দেৰগাঁও, 28 অক্টোবৰ : এমাহ দহদিন অতিক্ৰম কৰাৰ পাচত আজি পৰ্যন্ত ন্যায় লাভ কৰা নাই তেজপুৰত ৰহস্যজনকভাৱে মৃত্যু হোৱা বনকৰা কিশোৰীগৰাকীৰ পৰিয়ালে ৷ আনহাতে ঘটনাৰ অভিযুক্ত দম্পতী তথা অসম আৰক্ষী(Assam Police)ত কৰ্মৰত ৰাজীৱ বৰা আৰু অনুৰূপা শইকীয়াক বৰ্তমানেও গ্ৰেপ্তাৰ কৰিব পৰা নাই আৰক্ষীয়ে ৷ পলাতক হৈ থকা অভিযুক্ত দম্পতীটোক বিচাৰি উলিয়াবলৈ সক্ষম হোৱা নাই গোলাঘাট আৰু শোণিতপুৰ আৰক্ষীয়ে ৷
উল্লেখ্য যে, শাৰীৰিক অত্যাচাৰ আৰু যৌন নিৰ্যাতনৰ বাবেই বিগত 5 ছেপ্তেম্বৰত মৃত্যুক সাৱতি লৈছিল তেজপুৰৰ এগৰাকী 16 বছৰীয়া কিশোৰীয়ে । দেৰগাঁও থানা(Dergaon Police Station)ৰ মহিলা কনিষ্টবল অনুৰূপা শইকীয়াৰ ভাড়াঘৰত বনকৰা হিচাপে আছিল এটা দৰিদ্ৰ পৰিয়ালৰ কিশোৰীগৰাকী ।
মৃত্যুৰ তিনিদিন পূৰ্বে অসুস্থ অৱস্থাত কিশোৰীগৰাকীক তেজপুৰৰ পিতৃ-মাতৃৰ হাতত গতাই দিছিল দম্পতীটোৱে ৷ পিতৃ-মাতৃৰ হাতত গতাই দিয়াৰ পাচতে গুৰুতৰভাৱে অসুস্থ হৈ পৰা কিশোৰীগৰাকীক ভৰ্তি কৰোৱা হৈছিল চিকিৎসালয়ত । কিন্তু 5 ছেপ্তেম্বৰত হঠাতে মৃত্যুক সাৱতি লয় ভুক্তভোগী কিশোৰীগৰাকীয়ে ।
কিন্তু এই ঘটনাই লৈছিল অন্য এক মোৰ । দণ্ডাধীশে কিশোৰীগৰাকীৰ মৃত্যু শাৰীৰিক অত্যাচাৰ আৰু যৌন নিৰ্যাতনৰ বাবে হোৱা বুলি স্পষ্টভাৱে জানিবলৈ দিয়ে ৷ এই ভয়ংকৰ ঘটনাৰ অভিযুক্ত কাৰ আৰ্শীবাদত ইমান দিনে পলাই থাকিবলৈ সক্ষম হৈছে, তাক লৈ এতিয়া প্ৰশ্ন উত্থাপন হৈছে প্ৰতিগৰাকী সচেতন লোকৰ মনত ।
ইফালে এগৰাকী অসহায় বনকৰা কিশোৰীৰ মৃত্যুৰ পিছত দুৰ্ভগীয়া পৰিয়ালটোক ন্যায় দিব নোৱাৰা অসম আৰক্ষীৰ ভুমিকাক লৈ এতিয়া জাঙুৰ খাই উঠিছে সদৌ অসম ছাত্ৰ সন্থা(AASU)ৰ মুখ্য সাংগঠনিক সম্পাদক অভিৱৰ্তন গোস্বামী । আৰক্ষীয়ে অভিযুক্ত দম্পতী বিচাৰি উলিয়াব নোৱাৰা বিষয়টোত হতবাক হৈ পৰিছে অৰুণ গোস্বামী(Arun goswami)ৰ দৰে প্ৰখ্যাত সাহিত্যিক তথা বুদ্ধিজীৱি গৰাকীও । সমগ্ৰ ঘটনাটো আৰক্ষী সঞ্চালক প্ৰধান(DGP)ক হস্তক্ষেপ কৰাৰ দাবী উত্থাপন কৰিছে বিশিষ্ট সাহিত্যিক গৰাকীয়ে ৷
প্ৰশ্ন উত্থাপিত হৈছে, অভিযুক্ত অনুৰূপা-ৰাজীৱক গ্ৰেপ্তাৰ কৰিবলৈ সক্ষম হ’বনে অসম আৰক্ষী ? গোলাঘাট আৰু শোণিতপুৰ আৰক্ষীয়ে দুৰ্ভগীয়া পৰিয়ালটোক দিব পাৰিবনে উচিত ন্যায় ? স্থানীয় সচেতন মহলে জনাইছে দাবী, শীঘ্ৰেই অভিযুক্ত আৰক্ষী দম্পতীক গ্ৰেপ্তাৰ কৰি দুৰ্ভগীয়া পৰিয়ালটোক প্ৰদান কৰক ন্যায় ৷
লগতে পঢ়ক : বৰুৱা দম্পতীৰ হত্যাকাণ্ড সন্দৰ্ভত মুখ্যমন্ত্ৰীৰ প্ৰতিক্ৰিয়া
