গোলাঘাট, 19 জুন : গোলাঘাটৰ ঘিলাধাৰী বৰুৱা গাঁৱত আৰক্ষীয়ে অভিযান চলাই উদ্ধাৰ কৰে এগৰাকী মহিলা আৰু শিশুসহ ১৯ জনকৈ শ্ৰমিক ৷ আনন্দৰাম বৰা নামৰ লোকজনৰ ঘৰত অবৈধভাৱে ৰাখিছিল এই শ্ৰমিক সকলক ৷ এই পৰ্যন্ত ধনশিৰি মহকুমা আৰক্ষী প্ৰশাসনে আনন্দৰাম বৰাৰ পুত্ৰ মাইনা বৰাক গ্ৰেপ্তাৰ কৰি সোধা পোচা অব্যাহত ৰাখিছে ৷ টকাৰ বিনিময়ত দালালে আনন্দৰামক শ্ৰমিক যোগান ধৰাৰ গুৰুতৰ অভিযোগ উত্থাপন হোৱাৰ লগতে শাৰিৰীক অত্যাচাৰ চলাই আৰু মজুৰি নিদিয়াকৈয়ে শ্ৰমিক সকলক কাম কৰাই আছিল বুলি জানিব পৰা গৈছে ৷ উদ্ধাৰ হোৱা শ্ৰমিক সকলক বৰ্তমান গোলাঘাট আৰক্ষী থানাত ৰখা হৈছে ।
এক অভিযোগৰ ভিত্তিত ধনশিৰি মহকুমা আৰক্ষী বিষয়া প্ৰাঞ্জল বৰাৰ নেতৃত্বত বৰপথাৰ থানা আৰু ঘিলাধাৰী থানাৰ যুটীয়া অভিযানত উদ্ধাৰ কৰা হৈছিল নিৰ্যাতিত শ্ৰমিকসকলক ৷ সীমান্ত হাজৰিকা নামৰ সন্ধানহীন যুৱক এজনৰ পৰিয়ালৰ গোচৰৰ ভিত্তিত আৰক্ষীয়ে শ্ৰমিক সকলক উদ্ধাৰ কৰিবলৈ সক্ষম হয় ৷ সীমান্তৰ লগতে এগৰাকী গৰ্ভৱতী মহিলাসহ মুঠ ১৯ জন শ্ৰমিকক উদ্ধাৰ কৰে আৰক্ষীয়ে । শ্ৰমিক সকলৰ অভিযোগ অনুসৰি, তেওঁলোকক মাৰপিট কৰাৰ লগতে প্ৰায় এশ ডেৰশ পোৰা মাটিত খেতি কৰিবলৈ নিয়োজিত কৰা হৈছিল ৷
