নগৰবেৰা,4 এপ্ৰিলঃ"ছিণ্ডিকেট বন্ধ কৰাৰ প্ৰতিশ্ৰুতিৰে চৰকাৰ গঠন কৰা সৰ্বানন্দ সোণোৱাল চৰকাৰৰ দিনত আৰম্ভ হৈছে ন ন ছিণ্ডিকেট । 2018 চনৰ ছেপ্তেম্বৰ মাহৰ পৰা ৰাজ্যৰ পাৰঘাটসমূহ বন্ধ ৰখাত উক্ত পাৰঘাটসমূহৰ নামত চলিছে বৃহৎ ছিণ্ডিকেট । চৰকাৰী পৃষ্ঠপোষকতাত ছিণ্ডিকেট চলাৰ বাবেই কোটি কোটি টকাৰ ৰাজহ হেৰুৱাব লগা হৈছে চৰকাৰে ।" এক সংবাদমেলৰ জৰিয়তে এই অভিযোগ ছাত্ৰ মুক্তি সংগ্ৰাম সমিতিৰ ৷
উল্লেখ্য যে,উত্তৰ গুৱাহাটীৰ ভয়ংকৰ ফেৰী দুৰ্ঘটনাৰ পাচতে নিৰাপত্তাজনিত কাৰণত 2018 বৰ্ষৰ 7 ছেপ্তেম্বৰৰ পৰাই ৰাজ্যত বন্ধ হৈ আছে আভ্যন্তৰীণ জল পৰিবহন বিভাগৰ পাৰঘাটসমূহ । কিন্তু পাৰঘাটসমূহ বন্ধ ৰখা দেখুৱালেও চৰকাৰী নিৰ্দেশনাক বুঢ়া আঙুলি দেখুৱাই এটা চক্ৰই নিৰ্বিবাদে চলাই গৈছে এনে পাৰঘাটসমূহ । সেয়েহে পাৰঘাটৰ নামত ৰাজ্যত ছিণ্ডিকেট আৰম্ভ কৰি দৈনন্দিন সংগ্ৰহ কৰা লাখ লাখ টকা জল পৰিবহন বিভাগৰ বিষয়া-কৰ্মচাৰীৰে হৰণ-ভগন কৰি ইয়াৰ ভাগ দিছপুৰীয়া সকলেও লয় বুলি অভিযোগ উত্থাপন কৰে ছাত্ৰ মুক্তি সংগ্ৰাম সমিতিয়ে ৷ যাৰ ফলত চৰকাৰে কোটি কোটি টকাৰ ৰাজহ হেৰুৱাব লগা হৈছে বুলি জনায় সন্থাটোৱে । আনহাতেএকমাত্ৰ ছিণ্ডিকেট চক্ৰটোক বৰ্তাই ৰখাৰ স্বাৰ্থতে আজি পৰ্যন্ত পাৰঘাটসমূহৰ নতুনকৈ ঠিকা আহ্বান কৰা হোৱা নাই বুলিও অভিযোগ উত্থাপন কৰে ছাত্ৰ মুক্তি সংগ্ৰাম সমিতিৰ সদস্যই ।
কেৱল এয়াই নহয়, ৰাজ্যত চলি থকা পাৰঘাটসমূহত প্ৰকৃত দূৰত্বৰ জোখ-মাখ নকৰাকৈ 1/2 কিলোমিটাৰৰ পাৰঘাটৰ দূৰত্ব 7/8 কিলোমিটাৰ দেখুৱাই নিজৰ ইচ্ছামতে যাত্ৰীৰ পৰা ধন আদায় কৰে বুলি উল্লেখ কৰি বৰপেটা জিলাৰ খোলাবান্ধা দঙৰা পাৰঘাটত এজন যাত্ৰীৰ পৰা 9 টকাৰ সলনি 20 টকা আৰু বাইক আৰোহীৰ পৰা 27 টকাৰ সলনি 40 টকা সংগ্ৰহ কৰা হয় বুলিও জনায় ছাত্ৰ মুক্তি সংগ্ৰাম সমিতিয়ে ।
ইপিনে পৰিবহন বিভাগৰ পাৰঘাটসমূহত যাত্ৰাৰ বাবে ন্যূনতম সা-সুবিধা নাই বুলি উল্লেখ কৰি জিৰণী চ'ৰা তথা খোৱা পানীৰ সুবিধাও উপলব্ধ নাই বুলি জনায় সন্থাটোৱে ৷ তাৰোপৰি চৰকাৰী নিৰ্দেশনাক অমান্য কৰি অতিৰিক্ত বোজা দি নাও চলাই থকা পাৰঘাটসমূহৰ প্ৰতি বিভাগটোৰ কোনো কাণসাৰ নাই বুলিও কয় সন্থাটোৱে । সেয়েহে আভ্যন্তৰীণ জল পৰিবহন বিভাগৰ পাৰঘাটসমূহত চলি থকা বৃহৎ ছিণ্ডিকেট বন্ধ কৰি পুনৰ ঠিকা আহ্বান কৰি সুস্থভাৱে চলাই ৰাজকোষৰ ক্ষতি ৰোধ কৰিবলৈ দাবী জনায় ছাত্ৰ মুক্তি সংগ্ৰাম সমিতিৰ বৰপেটা জিলা শাখাই ।
