বাঁহ-কাঠৰ খুঁটা আৰু মকৰা জালৰ নিচিনা বিদ্যুতৰ তাঁৰ আঁতৰাব বিমল বৰাই

শক্তি বিভাগ নহয়,ক'ভিড পৰিস্থিতি বুজ লোৱাৰ উদ্দেশ্যে গোৱালপাৰাত উপস্থিত হৈছে শক্তিমন্ত্ৰী বিমল বৰা ৷ তিনিদিনীয়া কাৰ্যসূচীৰে বৃহস্পতিবাৰৰ বিয়লি গোৱালপাৰাত উপস্থিত হয় মন্ত্ৰী গৰাকী ৷

গোৱালপাৰা, 9 জুলাই : মুখ্যমন্ত্ৰী ড৹ হিমন্ত বিশ্ব শৰ্মাৰ মন্ত্ৰীসভাৰ এজন দায়িত্বশীল মন্ত্ৰী হিচাপে শপত গ্ৰহণ কৰাৰ পাছৰে পৰা ধাৰাবাহিকভাৱে সক্ৰিয় অৱস্থাত দেখা পোৱা গৈছে মন্ত্ৰী বিমল বৰাক ৷ ৰাজ্যত অব্যাহত থকা ক'ভিড পৰিৱেশৰ মাজতে শক্তি বিভাগটোত সততে দেখা পোৱা বিসংগতি সমূহ এফালৰ পৰা দূৰ কৰিবলৈ উঠি-পৰি লাগিছে মন্ত্ৰী গৰাকী ৷ বিগত দুমহীয়া কাৰ্যকালত প্ৰায় প্ৰতিখন জিলাতে উপস্থিত হৈ বিভাগটোত সংঘটিত হৈ থকা অনিয়ম সমূহৰ বিৰুদ্ধে সৰৱ হৈছে মন্ত্ৰী বিমল বৰা ৷ ইয়াৰ মাজতে ক'ভিড পৰিস্থিতি বুজ লোৱাৰ উদ্দেশ্যে গোৱালপাৰাত উপস্থিত হৈছে শক্তি মন্ত্ৰী বিমল বৰা ৷

তিনিদিনীয়া কৰ্মসূচী হাতত লৈ বৃহস্পতিবাৰৰ বিয়লি গোৱালপাৰাত উপস্থিত হয় মন্ত্ৰী বিমল বৰা ৷ ইয়াৰ পাছতে জিলাখনৰ মৰনৈ আৰু মাটিয়া খণ্ড প্ৰাথমিক চিকিৎসালয়ত উপস্থিত হৈ ক'ভিড পৰিস্থিতিৰ বুজ লয় মন্ত্ৰী গৰাকীয়ে ৷ মৰনৈ খণ্ড প্ৰাথমিক চিকিৎসালয় পৰিদৰ্শন কৰি অঞ্চলটোৰ ক'ভিড পৰিস্থিতিক লৈ উদ্বেগ প্ৰকাশ কৰে মন্ত্ৰী বৰাই ৷ ক'ভিড সংক্ৰমণ উদ্বেগজনক ভাৱে বৃদ্ধি পোৱাত ৰাইজক সজাগ হোৱাৰ আহ্বান জনোৱাৰ লগতে কন্টেইনমেন্ট জ'নৰ নীতি নিৰ্দেশনা কাৰ্যকৰী কৰাৰ ক্ষেত্ৰত কঠোৰ হ’বলৈ আৰক্ষীক নিৰ্দেশ দিয়ে ৷

ইফালে জিলাখনৰ বিভিন্ন প্ৰান্তৰ লোকে চুৰি কৰি বিদ্যুৎ ব্যৱহাৰ কৰাটো দৃষ্টি গোচৰ হোৱা বুলি উল্লেখ কৰি এই অসৎ কার্যৰ পৰা তেনে লোকক বিৰত থাকিবলৈ আহ্বান জনায় মন্ত্ৰী বিমল বৰাই ৷ তদুপৰি বাঁহ-কাঠৰ খুটি আৰু মকৰা জালৰ নিচিনা বিদ্যুৎ তাঁৰৰ ক্ষেত্ৰতো ব্যৱস্থা ল'ব বুলি উল্লেখ কৰে মন্ত্ৰী গৰাকীয়ে ৷

উল্লেখ্য যে, ক'ভিডৰ ভয়াৱহ পৰিস্থিতিৰ মাজতে শেহতীয়াকৈ বিদ্যুৎ চুৰি কৰা সকলৰ বিৰুদ্ধে কঠোৰ হোৱা দেখা গৈছে শক্তি মন্ত্ৰী বিমল বৰাক ৷ লগতে বিভাগটোত কৰ্মৰত প্ৰতিগৰাকী কৰ্মচাৰীকে নিজৰ কাম সূচাৰূপে কৰাৰ কঠোৰ নিৰ্দেশ প্ৰদান কৰিছিল মন্ত্ৰী গৰাকীয়ে ৷ বিদ্যুৎ চুৰি কৰা সকলৰ বিৰুদ্ধে কঠোৰ ব্যৱস্থা গ্ৰহণ কৰাৰ সকীয়নি দিয়াৰ সমান্তৰালকৈ ইয়াক হাতে-কামে ব্যৱহাৰ কৰা দেখা পোৱা গৈছে ৷

লগতে পঢ়কঃ এসময়ৰ ৰঞ্জী ক্ৰিকেটৰ দুৰ্দান্ত বলাৰ এতিয়া ফুটপাথৰ চাহ দোকানী