গোৱালপাৰা,1 মে': সমগ্ৰ দেশৰ লগতে ৰাজ্যত ক’ভিভ-১৯ ৰ দ্বিতীয় লহৰে সংহাৰী ৰূপ লোৱাৰ মাজতে গোৱালপাৰাৰ মাটিয়াত ক’ভিড আক্ৰান্ত ৰোগীক লৈ চৰম হেতালি খেলাৰ অভিযোগ উত্থাপিত হৈছে স্বাস্থ্য বিভাগৰ বিৰুদ্ধে ৷ মাটিয়া আদৰ্শ স্বাস্থ্যকেন্দ্ৰৰ পৰা এগৰাকী 60 ঊৰ্ধ্বৰ ক’ভিডত আক্ৰান্ত ৰোগীক এম্বুলেঞ্চ অবিহনে চাইকেলেৰে পঠাই দিয়া হ’ল ঘৰলৈ ৷
প্ৰাপ্ত তথ্য অনুসৰি, শনিবাৰে মাটিয়াৰ মজকুৰি গাঁৱৰ প্ৰভাত কলিতা নামৰ এগৰাকী ব্যক্তিৰ সামান্য গা বেয়া হৈ থকাত তেওঁ চিকিৎসাৰ বাবে চাইকেলেৰে মাটিয়া আদৰ্শ চিকিৎসালয়লৈ যায় ৷ তেনে সময়তে চিকিৎসালয়খনত স্বাস্থ্য পৰীক্ষাৰ লগতে ৰেপিড এণ্টিজেন টেষ্ট কৰাত ব্যক্তিগৰাকীৰ দেহত ক’ভিড ভাইৰাছ ধৰা পৰে ৷ পৰৱৰ্তী পৰ্যায়ত কোনো বিশেষ লক্ষণ নথকা ক’ভিড ৰোগীগৰাকীক চিকিৎসালয় কৰ্তৃপক্ষই হোম আইচ’লেচনত ৰখাৰ সিদ্ধান্তৰে ঘৰলৈ যাবলৈ দিয়ে ৷
কিন্তু আশ্বৰ্যজনক কথা, প্ৰায় 60 ঊৰ্ধৰ ক’ভিড ৰোগীগৰাকীক এম্বুলেঞ্চৰ পৰিৱৰ্তে দায়িত্বজ্ঞানহীনতাৰে চাইকেলেৰে ঘৰলৈ যাব দিয়ে চিকিৎসালয় কৰ্তৃপক্ষই ৷ এনেদৰে অসুৰক্ষিত অৱস্থাত এগৰাকী ক’ভিড ৰোগীক ঘৰলৈ পঠিয়াই দিয়াত অঞ্চলজুৰি তীব্ৰ প্ৰতিক্ৰিয়াৰ সৃষ্টি হৈছে ৷ আনহাতে, বৰ্তমানেও স্বাস্থ্য বিভাগৰ কোনো লোক ব্যক্তি গৰাকীৰ ঘৰত উপস্থিত হৈ পৰিয়ালৰ আন লোকৰ ক’ভিড পৰীক্ষা নকৰাত ভাইৰাছবিধৰ সংক্ৰমণ ঘটাৰ আশংকা কৰা হৈছে ৷
লগতে পঢ়ক : লুইত এৰ' প্ৰডাক্ট পৰিদৰ্শন ড৹ হিমন্ত বিশ্ব শৰ্মাৰ
