গোৱালপাৰা, ১২ মাৰ্চ: গোৱালপাৰাত নিৰ্বাচনী উন্মাদনাৰ মাজতে চোৰৰ চাফাই অভিযান । গোৱালপাৰা চহৰৰ ১ নং কলনীৰ তিনিটাকৈ কালী মন্দিৰত চোৰে চলালে চাফাই অভিযান । চহৰখনৰ ১ নং কলনিত থকা শিৱ মন্দিৰৰ শিৱ মূৰ্তিৰ ডিঙিত থকা ৪৫ ভৰিৰ ৰূপৰ সাপ, শিৱৰ সোণৰ চকু দুটাৰ লগতে আন দুটা কালী মন্দিৰৰ সোণ-ৰূপৰ অলংকাৰ আৰু দান বাকচৰ ধনলৈ উধাও হয় চোৰৰ দল ।
নিশা চোৰৰ দলটোৱে তলা ভাঙি মন্দিৰৰ ভিতৰত প্ৰৱেশ কৰি দানপাত্ৰ ভাঙি সোণ-ৰূপৰ আ-অলংকাৰ লৈ উধাও হোৱাৰ লগতে মন্দিৰৰ বয়-বস্তু ভাঙি লণ্ডভণ্ড কৰে । পুৱাৰ ভাগত মন্দিৰত পূজা কৰিবলৈ অহা ভক্তপ্ৰাণ ৰাইজে প্ৰত্যক্ষ কৰে । লগে লগে আৰক্ষীক অৱগত কৰে । ঘটনাৰ খবৰ লাভ কৰিয়েই ঘটস্থলীত আৰক্ষীৰ লোক উপস্থিত হৈ সমগ্ৰ ঘটনাৰ বুজ লয় ।
