গোৱালপাৰা, 22 ছেপ্টেম্বৰ: "সদায় বেংকলৈ যাও, লোনটো আজিও নহয় কালিও নহয়, সদায় মোক ফোন, মেছেজ কৰি থাকে, সেইদিনা মোক ফোন কৰি কৈছে মোৰ লগত হোটেলত গলে লোনটো মোকলাই দিম ৷" এয়া এগৰাকী বেংক গ্ৰাহকৰ ভাষ্য ৷ ঘটনাটো গোৱালপাৰা জিলাৰ ধূপধৰাৰ ৷ এই লৈ এতিয়া উত্তপ্ত ধূপধৰা (Tense situation in Dhupdhara) ৷
ঘটনাৰ বিৱৰণী অনুসৰি, ধূপধৰাস্থিত অসম গ্ৰামীণ বিকাশ বেংকৰ ক্ষুদ্ৰ গ্ৰাহক সেৱা কেন্দ্ৰটোত অনৈতিক কাৰ্য সংঘটিত হোৱাৰ এটা দৃশ্য ভাইৰেল হৈছিল সামাজিক মাধ্যমত (A viral video sparked tension in Dhupdhara) । তাৰ পিছতেই ৰাইজৰ মাজত সৃষ্টি হয় ব্যাপক প্ৰতিক্ৰিয়াৰ ৷ ঘটনাৰ পিছতেই আজি ৰাইজ তথা ধূপধৰা আৰু ধনুভাঙা আঞ্চলিক ৰাভা ছাত্ৰ সন্থাৰ সদস্য উপস্থিত হয়গৈ অসম গ্ৰামীণ বিকাশ বেংকৰ গ্ৰাহক সেৱা কেন্দ্ৰটোত ৷ ৰাইজ উপস্থিত হৈ জবাবদিহি কৰে গ্ৰাহক সেৱা কেন্দ্ৰটোৰ কৰ্মচাৰী এলেন কছাৰীক ৷
ৰাইজৰ সন্মুখত এই কুকৰ্ম সংঘটিত কৰা বুলি অকপট স্বীকাৰোক্তি এলেনৰ ৷ অৱশ্যে এই ঘটনাটো তিনিমাহ পূৰ্বৰ বুলি স্বীকাৰ কৰিছে এলেন কছাৰীৰ লগতে মহিলাগৰাকীয়ে । আনহাতে এই সমগ্ৰ ঘটনাৰ দৃশ্য বন্দী হৈছিল গ্ৰাহক সেৱা কেন্দ্ৰৰ ভিতৰত থকা চি চি টি ভি কেমেৰাত ।
ইয়াৰ পিছতে ৰাইজে উত্তম-মধ্যম সোধাই এলেনক গতাই দিয়ে ধূপধৰা আৰক্ষীক ৷ ৰাইজে এলেনৰ বিৰুদ্ধে দাখিল কৰিছে এখন এজাহাৰ ৷ সেই এজাহাৰৰ ভিত্তিতে ধূপধৰা থানাত ৮২/২২ নম্বৰত ভাৰতীয় দণ্ডবিধি আইনৰ ৩৭৬ ধাৰাৰ অধীনত গোচৰ ৰুজু কৰি এলেন কছাৰীক আজি জেল হাজোতলৈ প্ৰেৰণ কৰা বুলি জানিব পৰা গৈছে ।
উল্লেখ্য যে, ৰাইজৰ অভিযোগ - বিভিন্ন নাৰীজনীত কেলেংকাৰীত দীৰ্ঘদিনৰ পৰা জড়িত হৈ আছিল এলেন ৷ বেংকৰ পৰা কোনো মহিলা গ্ৰাহকে ধন উঠাব আহিলেই অশ্লীল ইংগিত দিয়াৰো অভিযোগ ধৃত এলেনৰ বিৰুদ্ধে ৷ ইফালে পুৰুষকে ধৰি অন্যান্য গ্ৰাহকৰ ক্ষেত্ৰতো উৎকোচ লৈহে ধন মোকলাই দিয়ে এলেনে ৷ যদি উৎকোচ দিব নোৱাৰে তেন্তে বিভিন্ন ধৰণৰ অজুহাত দেখুৱাই গ্ৰাহকক হাৰাশাস্তি কৰাৰো অভিযোগ ধৃত এলেনৰ বিৰুদ্ধে ৷ কেৱল ইমানেই নহয়, প্ৰধানমন্ত্ৰী আৱাস যোজনাৰ বাসগৃহৰ নামত অহা ধন উলিয়াই দিয়াৰ নামতো গ্ৰাহকৰ পৰা ধন দাবী কৰাৰ গুৰুতৰ অভিযোগ আছে এলেন কছাৰীৰ বিৰুদ্ধে ।
লগতে পঢ়ক: শিক্ষক দিৱসৰ দিনাই শিক্ষক সমাজক লজ্জানত কৰা এটা ঘটনা
