ডিমা হাছাও, 5 অক্টোবৰ: হাফলঙত COVID ৰোগত আক্ৰান্ত হৈ মৃত্যু হোৱা এগৰাকী লোকৰ অন্তিম সৎকাৰক লৈ সৃষ্টি বিতৰ্কৰ ৷ শনিবাৰে হাফলঙৰ বাসিন্দা বলবাহাদুৰ থাপা (75) নামৰ এগৰাকী লোকে COVID-19 ত আক্ৰান্ত মৃত্যুক সাৱটি লোৱাৰ পাচত হাফলং শ্মশানত তেওঁৰ মৃতদেহ দাহ কৰাত বাধা প্ৰদান কৰে ৰাইজে ৷
অসমৰ অন্যতম পাহাৰীয়া জিলা খনত জিলা প্ৰশাসনৰ উদাসীনতাৰ বাবেই এতিয়া কৰ'ণা আক্ৰান্ত লোকক দাহ কৰিবলৈয়ো স্থান নাই বুলি অভিযোগ উত্থাপন কৰে ৷ কেৱল জিলা প্ৰশাসনৰ উদাসীনতাৰ বাবেই আজি এনে পৰিস্থিতিৰ সন্মুখীন হ'বলগীয়া হৈছে বুলিও উল্লেখ কৰে মৃত লোকগৰাকীৰ আত্মীয়ই ৷ মৃতকৰ আত্মীয়ৰ অভিযোগ অনুসৰি, বলবাহাদুৰ থাপাৰ শনিবাৰে দিনৰ প্ৰায় 11:30 বজাত মৃত্যু হয় ৷ তাৰ পাচৰ পৰাই আত্মীয়ই জিলা প্ৰশাসনৰ তৰফৰ পৰা কোনো ধৰণৰ সহযোগিতা লাভ কৰা নাই বুলি অভিযোগ উত্থাপন কৰে ৷ ইপিনে 14 ঘণ্টা বলবাহাদুৰ থাপাৰ মৃতদেহ হাফলং অসামৰিক চিকিৎসালয়ৰ মৰ্গত থকাৰ পিচত হোজাই জিলা প্ৰশাসনৰ সহযোগিতাত দেওবাৰে লংকাৰ উদালিত শেষকৃত্য সম্পন্ন কৰা হয় ৷
লগতে পঢ়ক: লিকাবালিত ভয়ংকৰ ঘটনাঃ বাঢ়নী পানীয়ে উটুৱাই নিলে 3 ডাম্পাৰ চালকক
