ডিমা হাছাও, ২৭ নৱেম্বৰ: হত্যাকাৰীৰ ৰূপত আইনৰ ৰক্ষক । ঠিকাদাৰ সন্তোষ হোজাইৰ অপহৰণ আৰু হত্যাকাণ্ড সন্দৰ্ভত চি আই ডিয়ে চলোৱা তদন্তত পোহৰলৈ আহিছে বহু চাঞ্চল্যকৰ তথ্য (Santosh Hojai murder case investigation) । শেহতীয়াকৈ কনিষ্টবল, আৰক্ষী বিষয়াসহ ৭ জনৰ বিৰুদ্ধে গুৱাহাটী উচ্চ ন্যায়ালয়ত চাৰ্জশ্বীট দাখিল কৰিলে চি আই ডিয়ে (CID filed charge sheet against seven persons) । ডিমা হাছাও জিলাৰ সাধাৰণ লোক আৰু বিভিন্ন সংগঠনে এই হত্যাকাণ্ডৰে আৰক্ষী বিষয়া জড়িত থকাৰ অভিযোগ উত্থাপন কৰি আহিছিল ।
ঠিকাদাৰ সন্তোষ হোজাইৰ অপহৰণ আৰু হত্যাকাণ্ডত জড়িত থকাৰ অভিযোগত ডিমা হাছাও জিলাৰ তৎকালীন আৰক্ষী অধীক্ষক বীৰবিক্ৰম গগৈ আৰু উপ-আৰক্ষী অধীক্ষক সূৰ্যকান্ত মৰাণৰ বিৰুদ্ধে চি আই ডিয়ে চাৰ্জশ্বীট দাখিল কৰিছে (Charge sheet filed against Assam police officers) । উল্লেখ্য যে, ২০২০ চনৰ ২৪ এপ্ৰিলত লকডাউনৰ সময়তে ডিমা হাছাও জিলাৰ হাৰেংগাজাও আৰক্ষী থানাৰ অন্তৰ্গত দামদিহাওৰ গাঁৱৰ পৰা ঠিকাদাৰ তথা উগ্ৰপন্থী সংগঠন ডিএইচডিৰ প্ৰাক্তন সদস্য সন্তোষ হোজাইক তেওঁৰ বাসগৃহৰ পৰা ৫-৬ জনীয়া দুৰ্বৃত্তৰ দলে অপহৰণ কৰি নিছিল । তেতিয়া সন্তোষ হোজাইৰ পত্নীয়ে উত্থাপন অভিযোগ কৰিছিল যে, তেওঁৰ স্বামীক অপহৰণ কৰি লৈ গৈছিল উপ-আৰক্ষী অধীক্ষক সূৰ্যকান্ত মৰাণে ।
ইয়াৰ পিছতে ৩০ এপ্ৰিলত ডিমা হাছাও জিলাৰ লাংটিং আৰক্ষী থানাৰ অন্তৰ্গত লাইলিং সংৰক্ষিত বনাঞ্চলত মাটিৰ তলত পুতি থোৱা অৱস্থাত উদ্ধাৰ কৰা হৈছিল ঠিকাদাৰ সন্তোষ হোজাইৰ মৃতদেহ । এতিয়া এই ঘটনা সন্দৰ্ভত চিআইডিয়ে দাখিল কৰা চার্জশ্বীটত উল্লেখ কৰা হৈছে যে, ডিএনএলএ উগ্ৰপন্থী সংগঠনৰ সদস্য এলভিন হোজায়ে তেতিয়াৰ আৰক্ষী অধীক্ষক বীৰবিক্ৰম গগৈক জনাইছিল যে, সন্তোষ হোজায়ে ডিএনএলক অস্ত্ৰ-শস্ত্ৰ যোগান ধৰি সহায় কৰে ।
সেয়ে, আৰক্ষীয়ে সন্তোষ হোজাইক ঘৰৰ পৰা আনি হাফলং আৰক্ষী অতিথিশালাত আৰু চৰকাৰী বাগান আৰক্ষী থানাত ৰাখি অমানৱীয় নিৰ্যাতন চলাইছিল । পিছত তেওঁক নিৰ্মমভাৱে হত্যা কৰিছিল । তাৰ পিছতে সূৰ্যকান্ত মৰাণে মাইবাং পেট্ৰ'ল পাম্পৰ পৰা পেট্ৰ'ল লৈ আনি লাইলিং সংৰক্ষিত বনাঞ্চলত সন্তোষ হোজাইৰ মৃতদেহ পেট্ৰ'ল ঢালি জ্বলাই দিয়ে ।
ইতিমধ্যে চি আই ডিয়ে সন্তোষ হোজাই হত্যাৰ লগত জড়িত থকাৰ অভিযোগত দুগৰাকী কনিষ্টবল আৰু ডিএনএলএ উগ্ৰপন্থী সংগঠনৰ সদস্য এলভিন হোজাইক ডিমাপুৰৰ পৰা গ্ৰেপ্তাৰ কৰিছে । কিন্তু তেতিয়াৰ আৰক্ষী অধীক্ষক বীৰবিক্ৰম গগৈ আৰু উপ-আৰক্ষী অধীক্ষক সূৰ্যকান্ত মৰাণৰ লগতে আন তিনি গৰাকী আৰক্ষীয়ে আগতীয়াকৈ গুৱাহাটী উচ্চ ন্যায়ালয়ৰ পৰা জামিন লৈ মুক্ত হৈ আছে ।
লগতে পঢ়ক:গোলাঘাটৰ বৰপথাৰত নকল সোণ(duplicate gold seized) সহ তিনি আটক
