ডিব্ৰুগড়, 22 নৱেম্বৰ : ডিব্ৰুগড় বিশ্ববিদ্যালয়ৰ নিলম্বিত উপাচাৰ্য ড৹ ৰঞ্জিত কুমাৰ তামুলীক ৰাজ্যপালে কৰিলে অপসাৰণ । ৰাজ্যপালে গঠন কৰি দিয়া উচ্চস্তৰীয় তদন্ত কমিটীৰ প্ৰতিবেদনৰ জৰিয়তে চলিত বৰ্ষৰ এপ্ৰিল মাহত নিলম্বন কৰা হৈছিল ড৹ ৰঞ্জিত কুমাৰ তামুলীক ৷
ইয়াৰ পাচতে ন্যায়িক যুঁজ আৰম্ভ কৰিছিল ডিব্ৰুগড় বিশ্ববিদ্যালয়ৰ নিলম্বিত উপাচাৰ্য গৰাকীয়ে ৷ এক দীঘলীয়া ন্যায়িক যুঁজৰ অন্তত সোমবাৰে অপসাৰিত কৰা হ’ল ডিব্ৰুগড় বিশ্ববিদ্যালয়ৰ এসময়ৰ বিৰ্তকিত উপাচাৰ্য ড৹ ৰঞ্জিত কুমাৰ তামুলীক । এতিয়াৰ পৰা বিদ্যালয়ৰ লগত কোনো সম্পৰ্ক নাথাকি ড৹ ৰঞ্জিত কুমাৰ তামুলীৰ ৷
উল্লেখ্য যে, ৰঞ্জিত কুমাৰ তামুলীৰ বিৰুদ্ধে ভিন্ন অনিয়ম, বিত্তীয় কেলেংকাৰিৰ সংঘটিত কৰা অভিযোগ উত্থাপন কৰিছিল বিশ্ববিদ্যালয়ৰ শিক্ষাৰ্থীসকলে । ইয়াৰ পাছতে ডিব্ৰুগড় বিশ্ববিদ্যালয়ৰ মজিয়াত আৰম্ভ হৈছিল উপাচাৰ্য বিৰুদ্ধে প্ৰতিবাদ ৷ আছু, বিশ্ববিদ্যালয়ৰ ছাত্ৰ সমাজ, শিক্ষক-কৰ্মচাৰী সকলোৱে প্ৰতিবাদ কৰিছিল ৰঞ্জিত কুমাৰ তামুলীৰ বিৰুদ্ধে ।
আন্দোলনৰ সমান্তৰালভাৱে সংবাদ মাধ্যমত ধাৰাবাহিকভাৱে বিষয়টো প্ৰকাশ পোৱাৰ পাচতে বিষয়টোৰ সন্দৰ্ভত তদন্ত বাবে এখন উচ্চস্তৰীয় তদন্ত কমিটী গঠন কৰি দিছিল ৰাজ্যপালে ৷ সেই সময়তে উচ্চস্তৰীয় তদন্ত কমিটীৰ প্ৰতিবেদনতে দোষী সাব্যস্ত হৈছিল একালৰ ডিব্ৰুগড় বিশ্ববিদ্যালয়ৰ বিৰ্তকিত উপাচাৰ্য ড৹ ৰঞ্জিত কুমাৰ তামুলী ৷
লগতে পঢ়ক: ডিব্ৰুগড় বিশ্ববিদ্যালয়ৰ উপাচাৰ্যক নিলম্বন
