মৰাণ, 25 জুলাই : বিগত বিধানসভা নিৰ্বাচনত সমগ্ৰ ৰাজ্যৰ লগতে চাবুৱা বিধানসভা সমষ্টিত কংগ্ৰেছ (Indian national congress)ৰ শোচনীয় পৰাজয়ৰ পিছত দলটোৰ পৰা নেতা কৰ্মীয়ে অন্যান্য দললৈ ঢাপলি মেলিছে । মাত্ৰ কেইদিনমানৰ পূৰ্বে সাত জনকৈ গুৰু দায়িত্ব বহনকাৰী কংগ্ৰেছ নেতাই বিজেপিত যোগদান কৰিছিল । শনিবাৰৰ দিনটোত সমষ্টিটোৰ তিনি শতাধিক কৰ্মীয়ে চাবুৱা বিধানসভা সমষ্টিৰ বিধায়ক পোনাকণ বৰুৱা (MLA Ponakon Baruah)ৰ উপস্থিতিত অসম গণ পৰিষদত (AGP) যোগদান কৰে ।
উল্লেখ্য যে, বিগত নিৰ্বাচনত দলীয় কৰ্মী সকলৰ পচন্দৰ প্ৰাৰ্থীক প্ৰাৰ্থিত্ব প্ৰদান নকৰি ন-কংগ্ৰেছী অজয় ফুকনক প্ৰাৰ্থিত্ব প্ৰদান কৰাত ক্ষুন্ন হৈছিল সমষ্টিটোৰ নেতা কৰ্মী সকল ৷ একেটা বিষয়তে কংগ্ৰেছ দল ত্যাগ কৰা বুলি সংবাদ মাধ্যমৰ আগত প্ৰকাশ কৰিছে কৰ্মীসকলে । এতিয়া সংগীত পৰিচালক অজয় ফুকনে (Ajoy Phukan) চাবুৱাত কংগ্ৰেছ দল শূণ্য কৰা বুলিও মন্তব্য কৰিছে ৷
ইফালে, ক্ৰমাৎ ভাল দিন আহিছে অসম গম পৰিষদ(AGP) দললৈ । বহু বছৰ শাসনৰ পৰা আঁতৰত থকা অসম গণ পৰিষদে বিজেপিৰ লগত মিত্ৰতা কৰি বিগত সোনোৱাল চৰকাৰ আৰু বৰ্তমান ড৹ হিমন্ত বিশ্ব শৰ্মা (Himanta Bishwa Sarma)ৰ নেতৃত্বত ৰাজ্য চৰকাৰৰ অংশীদাৰ হৈছে । সেয়ে এতিয়া, ক্ষুব্ধ প্ৰাক্তন কংগ্ৰেছ কৰ্মী সকলে বতৰ্মানৰ চাবুৱাৰ বিধায়ক গৰাকীৰ সৈতে আগন্তুক দিনত সমষ্টিটোৰ বাবে ঐক্যবদ্ধ হৈ কাম কৰি যাব বুলি জানিবলৈ দিছে ।
শনিবাৰে, চাবুৱাৰ বহুমুখী প্ৰকল্প ভৱনত আঞ্চলিক দলটোৰ চাবুৱা বিধান পৰিষদৰ উদ্যোগত আয়োজিত এক যোগদান কাৰ্যসূচীত পানীতোলা আৰু গুইজান ব্লক কংগ্ৰেছৰ নেতা কৰ্মীসকলে দলটোত যোগদান কৰে । যোগদানকাৰী সকলৰ ভিতৰত প্ৰাক্তন ব্লক কংগ্ৰেছৰ সভাপতি, সম্পাদক, যুৱ-কংগ্ৰেছৰ সভাপতি-সম্পাদক, পঞ্চায়তৰ প্ৰাক্তন সভাপতি, প্ৰাক্তন ৱাৰ্ড সদস্য আদিও আছে । সকলোকে অসম গণ পৰিষদৰ প্ৰাথমিক সদস্য পদ, দলীয় চিহ্নযুক্ত টুপী আৰু গলবস্ত্ৰ পিন্ধাই বিধায়ক পোনাকণ বৰুৱাই আদৰণি জনায় ।
লগতে পঢ়ক : বিজেপি গমন: বাজেট অধিৱেশন শেষ হোৱালৈ বাট চাইছে সুশান্তই
