অসাৰ হ'ল চৰকাৰৰ বিশুদ্ধ খোৱাপানীৰ প্ৰতিশ্ৰুতি

চৰকাৰৰ আঁচনিৰ জৰিয়তে বিশুদ্ধ খোৱা পানীৰ আশা পুহি ৰখা গাওঁবাসীয়ে টিউবেলৰ পৰা ওলোৱা আইৰনযুক্ত পানী খাই জীৱন নিৰ্বাহ কৰিবলগীয়া হৈছে ।

ডিব্ৰুগড়,28আগষ্টঃ ডিব্ৰুগড় জিলাৰ টিংখাং বিধানসভা সমষ্টিৰ গ্ৰাম্যাঞ্চল সমূহত এতিয়াও বিশুদ্ধ খোৱা পানী যোগান ধৰাত ব্যৰ্থ অসম চৰকাৰ ৷ ৰাইজে বৰ্তমানেও বিশুদ্ধ খোৱা পানীৰ বাবে হাহাকাৰ কৰিব লগীয়া হৈছে জিলাখনৰ বহু অঞ্চলত । টিংখাং সমষ্টিৰ অন্তৰ্গত ঔফলীয়া পানী যোগান কেন্দ্ৰ এতিয়া ভৰি পৰিছে জীৱ জন্তুৰ মল-মূত্ৰৰে ৷ চৰকাৰৰ আঁচনিৰ জৰিয়তে বিশুদ্ধ খোৱা পানীৰ আশা পুহি ৰখা গাওঁবাসীয়ে টিউবেলৰ পৰা ওলোৱা আইৰনযুক্ত পানী খাই জীৱন নিৰ্বাহ কৰিবলগীয়া হৈছে । অসম চৰকাৰৰ জনস্বাস্থ্য কাৰিকৰী বিভাগে কোটি কোটি টকা ব্যয় কৰি বিগত সময়ছোৱাত গ্ৰহণ কৰা আঁচনিসমূহৰ অধিকাংশই এতিয়া বিকল হৈ পৰিছে যদিও এতিয়াও অধিকাংশ কৰ্মচাৰীয়ে দৰমহা ভোগ কৰি আছে এই সমূহ আচঁনিৰ নামত ।