ডিব্ৰুগড়,7 মে' ঃ ডিব্ৰুগড় বিশ্ববিদ্যালয়ৰ স্নাতকোত্তৰ ছাত্ৰ একতা সভাৰ সাধাৰণ সম্পাদকক প্ৰাণে মৰাৰ ভাবুকি। মাজনিশা বিশ্ববিদ্যালয়খনৰ স্নাতকোত্তৰ ছাত্ৰ একতা সভাৰ সাধাৰণ সম্পাদকৰ দ্বায়িত্বত থকা ৰাহুল ছেত্ৰীক এক অচিনাকি নম্বৰৰ পৰা অহা ফোন কল যোগে প্ৰাণে মৰাৰ ভাবুকি প্ৰদান কৰে ৷
ৰাহুলে জনোৱা মতে ফোনকলত ধমকি দিয়াৰ লগতে ৰাহুলৰ পিতৃ-মাতৃক উদ্দেশ্যি অশ্ৰাব্য গালি গালাজ কৰে অচিনাক্ত ব্যক্তিগৰাকীয়ে ৷ উল্লেখ্য যে ,ডিব্ৰুগড় বিশ্ববিদ্যালয়ৰ পৰিসংখ্যা বিজ্ঞান বিভাগত অধ্যয়নৰত ছাত্ৰ তথা বিশ্ববিদ্যালয়ৰ স্নাতকোত্তৰ ছাত্ৰ একতা সভাৰ সাধাৰণ সম্পাদকৰ পদত থকা ৰাহুল ছেত্ৰীয়ে বৰ্তমান লক্ ডাউনৰ সময়ত তিনিচুকীয়াৰ লেখাপানীত থকা নিজ গৃহত আছে । য'ত বুধবাৰে নিশা প্ৰায় 12 বজাত 87.....86 নম্বৰৰ পৰা ফোন কলটো আহিছিল ৰাহুললৈ।
উল্লেখ্য যে, শেহতীয়াকৈ ৰাহুলে কা আন্দোলনৰ সময়ত বিশ্ববিদ্যালয়ৰ ছাত্ৰ সমাজক সন্মুখৰ পৰা নেতৃত্ব দি প্ৰায় প্ৰতিটো কাৰ্যসূচীত তীব্ৰ প্ৰতিবাদ গঢ়ি তুলিছিল । যাৰ পৰিপ্ৰেক্ষিত বিগত মাৰ্চ মাহত নিয়াই চমন যোগে মাতি নিছিল ৰাহুলক ৷ ইফালে 2019ৰ ডিচেম্বৰত অসম আৰক্ষীৰ দ্বাৰা ডিব্ৰুগড় সদৰ থানাত আটক হৈছিল ছাত্ৰ নেতা গৰাকী।
