ডিব্ৰুগড়,মাজুলী, 24 ছেপ্টেম্বৰ : ডিমৌ পথ দুৰ্ঘটনাই অকালতে শেষ কৰি পেলালে প্ৰজ্ঞাৰ এগছি বন্তি ৷ 23 ছেপ্টেম্বৰ তাৰিখে পুৱা ডিমৌত সংঘটিত হোৱা ভয়ংকৰ পথ দুঘৰ্টনাটোত নিহত হৈছিল ন জনকৈ যাত্ৰী ৷ তাৰ মাজতেই আছিল ডিব্ৰুগড়ৰ এগৰাকী প্ৰতিভাৱান ছাত্ৰী সুব্ৰতা বৰা ৷ ডিব্ৰু মহাবিদ্যালয়ৰ উপাধ্যক্ষ চন্দ্ৰগুপ্ত বৰা আৰু সহযোগী অধ্যাপিকা ৰূপজ্যোতি বৰাৰ কন্যা আছিল সুব্ৰতা ৷
অতি মেধাৱী ছাত্ৰী সুব্ৰতাই যোৰহাট কৃষি বিশ্ববিদ্যালয়ৰ পৰাই সফলতাৰে স্নাতকোত্তৰ ডিগ্ৰী গ্ৰহণ কৰি আৰম্ভ কৰিছিল গৱেষণা ৷ যোৱা 17 ছেপ্টেম্বৰত স্পেইনৰ ভেলেনচিয়াত এখন ছেমিনাৰত অংশ লৈ উলটি আহিছিল সুব্ৰতা ৷ তাৰ পাঁচটা দিনৰ পাচতেই পুৱাই যোৰহাটলৈ বুলি ওলাইছিল সুব্ৰতা ৷ দেউতাকে বাছ আস্থানলৈকে আগবঢ়াই দিছিল ছাত্ৰীগৰাকীক ৷ দেউতাকক বিদায় জনাই 7.15 বজাত যোৰহাট অভিমুখে ৰাওনা হৈছিল সুব্ৰতা ৷
পুৱা 8.45 মিনিটত সুব্ৰতাৰ দেউতাকৰ মহাবিদ্যালয়ৰ অধ্যক্ষলৈ ফোন আহিল শিৱসাগৰ জিলা প্ৰশাসনৰ ৷ জনোৱা হ'ল ডিমৌত হোৱা এটা পথ দুৰ্ঘটনাত পতিত হৈছে সুব্ৰতা ৷ খবৰ পায়েই পিতৃ-মাতৃ দুয়ো ৰাওনা হৈছিল ঘটনাস্থলীলৈ ৷ কিন্তু আধাবাটতে আহিল সেই দুঃখবৰটো ৷ তেওঁলোকৰ মৰমৰ কন্যা সুব্ৰতা আৰু নাই ৷ হাঁহি মুখেৰে ঘৰৰ পৰা ওলাই যোৱা সুব্ৰতা উলটি আহিল এটি নিথৰ দেহ হৈ ৷ মেধাৱী ছাত্ৰীগৰাকীৰ অকাল বিয়োগে ম্ৰিয়মান কৰি তুলিছে অঞ্চলবাসীক ৷
সৰুৰে পৰাই অতিকৈ বিনম্ৰ,অমায়িক আৰু নিৰ্জু স্বভাৱৰ আছিল সুব্ৰতা ৷ পিচে সুব্ৰতা বিহীন ঘৰখনত এতিয়া কাঁহ পৰি জীণ যোৱা পৰিৱেশ ৷ ওচৰ-চুবুৰীয়া অথবা আত্মীয়সকলেও যেন দুৰ্ভগীয়া সুব্ৰতাৰ পিতৃ-মাতৃক শান্তনা দিয়াৰ বাহিৰে একোৱেই কৰিব পৰা নাই ৷
আনহাতে, এই দুৰ্ঘটনাত মৃত্যুক আঁকোৱালি লয় মাজুলীৰ পূৰ্ণকান্ত শৰ্মা নামৰ এজন লোকেও ৷ চকু চিকিৎসা কৰাবলৈ আহি দুৰ্ঘটনাত পতিত হয় লোকজন ৷ ইহ সংসাৰত পূৰ্ণকান্ত শৰ্মাই এৰি যায় পত্নীৰ লগতে এগৰাকী জীয়ৰী ৷ মাজুলীৰ দক্ষিণপাট কলিতা গাঁৱত সোমবাৰে নিশাই সৎকাৰ কৰা হয় শৰ্মাৰ নশ্বৰ দেহ ৷ এইদৰে হঠাৎ পূৰ্ণকান্ত শৰ্মাৰ মৃত্যু হোৱাত অঞ্চলটোত শোকৰ ছাঁ পৰিছে ৷
