ডিব্ৰুগড়, 20 নৱেন্বৰ: আঘোণ । তিনিটা আখৰৰ এক মায়ালগা শব্দ ৷ আঘোণ মানেই কৃষকৰ আশা, আঘোণ মানেই লেছেৰি বুটলাৰ বতৰ, লখিমীক ভঁড়াললৈ আদৰাৰ সুমধুৰ ক্ষণ । আঘোণ মানেই যেন গাঁৱৰ কৃষিজীৱী ৰাইজৰ বাবে এক ব্যস্ততাপূৰ্ণ মাহ । আঘোণে যেন মায়া জানে । সোণগুটিৰ সৌন্দৰ্যই যেন উদং পথাৰৰ বুকু জুৰায় । এতিয়া সোণোৱালী হৈছে আঘোণৰ পথাৰখন ।
কৃষকৰ সেউজীয়া সপোনবোৰ দিঠক হোৱাৰ সময় এয়া । কঠীয়া পৰাৰ পৰা প্ৰায় তিনি মাহৰ কষ্টৰ অন্তত সোণোৱালী হয় গ্ৰাম্যঞ্চলৰ প্ৰতিখন পথাৰ । ব্যস্ততা বাঢ়ে গাঁৱৰ জীয়াৰী, বোৱাৰী আৰু পুৰুষসকলৰ । কুঁৱলীৰ আৱৰণ ফালি কাঁচিৰ কিচকিচনিত সোণগুটি ধানে দাৱনীৰ লাহি হাতত তোলে নাচোনৰ তাল । আলিত বহি চুপতি মাৰি খোৱা ৰবাব টেঙাইও দি যায় এক সুকীয়া আস্বাদন । সঁচাই, আঘোণে লৈ আহে কোমল কোমল অনুভূতিৰ স্বাদ ।
এইসকলোবোৰৰ মাজত মৰাণ সমষ্টিৰ কুটুহা অঞ্চলৰ সোণোৱালী পথাৰত দেখিবলৈ পোৱা গ’ল এক ব্যতিক্ৰমী দৃশ্য । দাৱনীৰ ৰূপত কুটুহা বীণাপাণি হাইস্কুলৰ এদল ছাত্ৰী । হাতত কাঁচি লৈ অনায়াসে ধান কাটি গৈছে ছাত্ৰীসকলে । মাজে মাজে জুৰিছে গীতৰ কলি (Students were seen busy growing paddy)।
ৰবাব টেঙাৰো জুতি লৈছে ছাত্ৰীসকলে (Group of students busy in paddy fields) ৷ ছাত্ৰীসকলৰ লগতে বিদ্যালয়খনৰ শিক্ষয়িত্ৰীসকলেও কাটিছে ধান । ছাত্ৰীসকলৰ ধানকটা দৃশ্য চাবলৈ পথাৰত উপস্থিত হ’ল ডিব্ৰুগড় জিলা বিদ্যালয়সমূহৰ পৰিদৰ্শক দীপিকা চৌধুৰী (Dibrugarh Inspector Of Schools Dipika Choudhury)।
পৰিদৰ্শকগৰাকীয়েও হাতত কাঁচি লৈ ছাত্ৰীসকলৰ সৈতে কাটিলে ধান । পথাৰখন ভৰি পৰিল শতাধিক লোকে । কৃষি কৰ্মৰ সৈতে ছাত্ৰ-ছাত্ৰীসকলক পৰিচয় কৰি দিয়াৰ বাবেই এই পদক্ষেপ লৈছে বিদ্যালয়খনে । বিদ্যালয়খনৰ নৱম আৰু দশম শ্ৰেণীৰ ছাত্ৰীসকলক ধান কটা প্ৰণালী শিকাবৰ বাবে আৰু কৃষকসকলে কিমান কষ্টৰে কৃষি কৰ্ম কৰে, সেয়া ছাত্ৰ-ছাত্ৰীসকলক বুজাবৰ বাবেই এই প্ৰচেষ্টা লোৱা হৈছে বুলি জানিবলৈ দিয়ে প্ৰধান শিক্ষক লোহিত কুমাৰ গগৈয়ে ।
লগতে পঢ়ক: Students Busy in Paddy Field : আঘোণৰ সোণবৰণীয়া ধাননি পথাৰত দাৱনীৰ ৰূপত ছাত্ৰী
