মৰাণ, ১০ নবেম্বৰ: ডুমডুমা-ফিল'বাৰী সংযোগী ৰাষ্ট্ৰীয় ঘাইপথৰ বাদলাবেটা চাৰিআলিত মঙলবাৰে পথ দুৰ্ঘটনাত এজন ছাত্ৰৰ মৃত্যুক কেন্দ্ৰ কৰি উত্তপ্ত হৈ পৰে অঞ্চলটো । মুগল মাহালী আৰু সমীৰ মাহালী নামৰ ছাত্ৰ দুগৰাকীয়ে ৭ নৱেম্বৰত টিউচনৰ পৰা ঘৰলৈ আহি থকা সময়তেই এখন দ্ৰুতবেগী বাহনে খুন্দিয়াই থৈ যায় । আহত ছাত্ৰ দুজনক ততাতৈয়াকৈ অসম চিকিৎসা মহাবিদ্যালয়ত ভৰ্তি কৰা হয় ৷ কিন্তু সোমবাৰে চিকিৎসাধীন অৱস্থাত দুৰ্ঘটনাত গুৰুতৰভাৱে আহত মুগল মাহালীৰ মৃত্যু হয় ৷ আনহাতে সমীৰ মাহালীৰ অৱস্থা বৰ্তমানেও সংকটজনক ।
দুৰ্ঘটনাত মৃত্যু হোৱা ছাত্ৰ মুগল মাহালীৰ পৰিয়ালক উচিত ক্ষতিপূৰণ দিয়াৰ লগতে সংকটজনক অৱস্থাত চিকিৎসাধীন হৈ থকা সমীৰ মাহালীৰ উন্নত চিকিৎসাৰ দাবী জনাই মঙলবাৰে স্থানীয় লোকসকলে ডুমডুমা-ফিল'বাৰী সংযোগী ৰাষ্ট্ৰীয় ঘাইপথটো অৱৰোধ কৰি উত্তাল প্ৰতিবাদ সাব্যস্ত কৰে । অন্যহাতে, প্ৰায়েই দুৰ্ঘটনা সংঘটিত হৈ থকাৰ পৰিপেক্ষিতত ৰাষ্ট্ৰীয় ঘাইপথটোত বাহনৰ গতি নিয়ন্ত্ৰণৰ ব্যৱস্থা কৰাৰ বাবে দাবী জনাইছে প্ৰতিবাদী লোকসকলে ।
লগতে পঢ়ক: অসম চিকিৎসা মহাবিদ্যালয়ৰ অগ্নিকাণ্ডৰ বুজ ললে জিলা উপায়ুক্তই
