মৰান, 7 ফেব্ৰুৱাৰী: অসমলৈ প্ৰধানমন্ত্ৰীৰ আগমণৰ পাছতে ৰাইজৰ ৰোষত পৰে মৰাণ সমষ্টিৰ বিধায়ক চক্ৰধৰ গগৈ ৷ বিধায়ক গৰাকীৰ বিৰুদ্ধে মিথ্যাচাৰৰ অভিযোগ উত্থাপন কৰি ক্ষুব্ধ ৰাইজে তেঁওৰ সন্মুখতে গ' বেক শ্ল'গান দি ক্ষোভৰ বৰ্হিপ্ৰকাশ ঘটায় ৷ বিধায়ক গৰাকীৰ বিৰুদ্ধে মুৰ্দাবাদ ধ্বনি দি ৰাইজে অঞ্চলটো কঁপাই তোলে ৷
জানিব পৰা মতে বিধায়ক গৰাকী সমষ্টিটোৰ লেজাই কলাখোৱা অঞ্চললৈ মথাউৰি নিৰ্মাণ সন্দৰ্ভত এক আলোচনা সভালৈ গৈছিল ৷ উক্ত আলোচনা সভালৈ গৈয়েই বিধায়ক গৰাকী ৰাইজৰ ৰোষত পৰে ৷ বিধায়ক গৰাকীয়ে প্ৰদান কৰা মন্তব্যৰ বিৰুদ্ধে ৰাইজে অলেখ প্ৰশ্নৰে গগৈক ব্যতিব্যস্ত কৰি তোলে ৷
অভিযোগ অনুসৰি প্ৰায় 130 টা পৰিয়ালৰ জীৱন বিপদাপন্ন কৰি পথৰ ওপৰত মথাউৰি নিৰ্মাণ কৰিবলৈ লোৱাৰ ফলতে ৰাইজ ক্ষুব্ধ হৈ পৰে ৷ উত্তেজিত ৰাইজে বিভিন্ন প্ৰশ্নৰে বিধায়ক গৰাকীক থকা সৰকা কৰাৰ পাছতে অৱশেষত গগৈয়ে মথাউৰিটো নদীৰ কাষেৰে নিৰ্মাণ কৰাৰ বাবে ব্যৱস্থা গ্ৰহণ কৰা হ'ব বুলি ৰাইজক অৱগত কৰে ৷
লগতে পঢ়ক: প্ৰধানমন্ত্ৰীৰ সভালৈ যোৱা বাহন ঘুৰাই পঠিয়ালে আটছাই
