মৰাণ, ৪ নৱেম্বৰ : মঙলবাৰে পুৱতি নিশা ডিব্ৰুগড়ৰ নাহৰকটীয়াৰ কালীবাড়িৰ কালী মন্দিৰত প্ৰৱেশ কৰে এটা গভাইত চোৰ । এপদ এপদকৈ দেৱীৰ প্ৰতিমাৰ আ-অলংকাৰ খুলি নিজৰ পকেটত ভৰালে চোৰটোৱে । কিন্তু দশা বেয়া আছিল চোৰৰ । মন্দিৰৰ সম্পদ চুৰি কৰিলে ঠিকেই, কিন্তু চোৰে উমানেই নাপালে যে, মন্দিৰৰ ভিতৰত স্থাপন কৰা চিচিটিভি কেমেৰাত বন্দী হৈছে সমগ্ৰ দৃশ্য । অৱশেষত আৰক্ষীৰ জালত পৰিল গভাইত চোৰটো ।
স্থানীয় ৰাইজে সন্দেহ কৰা মতে, চোৰটোৰ সৈতে আন লোকো জড়িত হৈ আছে । কিয়নো, চিচিটিভি ফুটেজত দেখা গৈছিল যে, চোৰটোৱে সকলো আ-অলংকাৰ চুৰি কৰিছে । কিন্তু চোৰটোক কৰায়ত্ত কৰাৰ পাচত তেনে কোনো বিশেষ সামগ্ৰী উদ্ধাৰ হোৱা নাই । ইতিমধ্যে চুৰিকাণ্ড সন্দৰ্ভত আৰক্ষীয়ে তদন্ত আৰম্ভ কৰিছে ।
আনহাতে, কালী পূজাৰ প্ৰাকক্ষণত এনেদৰে মন্দিৰত চুৰি কাৰ্য সংঘটিত হোৱাক লৈ চাঞ্চল্যৰ সৃষ্টি হৈছে ।
লগতে পঢ়ক: ওৰাং ৰাষ্ট্ৰীয় উদ্যানত মৃত অৱস্থাত উদ্ধাৰ ঢেকীয়াপতীয়া
