মৰাণ, ১৭ ডিচেম্বৰ: বালি মাফিয়াৰ পিছত এইবাৰ ডিব্ৰুগড়ত অবৈধভাৱে মাটি খননকাৰীৰ দপদপনি । প্ৰশাসনৰ নিৰ্দেশনাক ভেঙুচালি কৰি চোৰাংভাৱে মাটি খনন কাৰ্য অব্যাহত ৰাখিছে একাংশ অসাধু চক্ৰই । বুধবাৰে ডিব্ৰুগড় জিলা প্ৰশাসনে আবৈধ মাটি খননত ব্যৱহৃত এখন এক্সকেভেটৰ আৰু দুখন ডাম্পাৰ জব্দ কৰে ।
জানিব পৰা মতে, একাংশ সচেতন ৰাইজে ডিব্ৰুগড় জিলাৰ পূব ৰাজহ চক্ৰৰ অধীনৰ নাহৰসাঁকোৰ ভি জি আৰ এলেকাত এক্সকেভেটৰেৰে মাটি খনন কৰি থকা আৰু ডাম্পাৰেৰে মাটি কঢ়িয়াই থকাৰ খবৰ আৰক্ষীক দিছিল ।
এই খবৰ লাভ কৰাৰ পিছতে ডিব্ৰুগড়ৰ পূব ৰাজহ চক্ৰৰ চক্ৰ বিষয়া সুজাতা গগৈৰ উদ্যোগত ঘোঁৰামৰা আৰক্ষীয়ে অভিযান চলাই এক্সকেভেটৰ আৰু ডাম্পাৰ দুখন জব্দ কৰে ৷ পিছত জব্দ কৰা তিনিওখন বাহন আৰক্ষীয়ে বন বিভাগক গতাই দিয়ে ।
যধে-মধে মাটি খনন কাৰ্যত বাধা আৰোপ কৰি প্ৰশাসনে বিভিন্ন নিৰ্দেশনা জাৰি কৰিছে যদিও এইবোৰৰ প্ৰতি ভ্ৰূক্ষেপ নাই একাংশ লোকৰ । প্ৰশাসনৰ নীতি-নিৰ্দেশনালৈ অংগুষ্ঠ প্ৰদৰ্শন কৰি যতে ত'তে খনন চলাই মইমতালি কৰি আহিছে ।
লগতে পঢ়ক:মধ্য অসমৰ তিৱা স্বায়ত্ব শাসিত পৰিষদৰ নিৰ্বাচনৰ ভোটদান প্ৰক্ৰিয়া আৰম্ভ
