মৰাণ,17 জুলাই : বাঘজান কাণ্ডৰ (Baghjan fire) উত্তেজনা মাৰ নৌযাঁওতেই পুনৰ মৰাণৰ চেপনৰ বৃহত্তৰ বকতা দেওধাই অঞ্চলত অনুৰূপ ঘটনা সংঘটিত হোৱাৰ উপক্ৰম হৈছে ৷ কিয়নো বৃহস্পতিবাৰৰ দুপৰীয়াৰ পৰাই উক্ত অঞ্চলটোৰ 7/8 টা স্থানত তৈল পৰিবাহী পাইপ ফুটি অহৰহ তেল নিৰ্গত হোৱাৰ কথা জানিবলৈ দিছে স্থানীয় ৰাইজে ৷ ইয়াকে লৈ আতংকিত হৈ পৰিছে বৃহত্তৰ অঞ্চলটোৰ সাধাৰণ জনসাধাৰণ ৷ যিকোনো সময়তে বৃহত্তৰ অঞ্চলটো অগ্নিকুণ্ডত পৰিণত হ'ব বুলি স্থানীয় ৰাইজে আশংকা প্ৰকাশ কৰিছে ৷
ঘটনা সন্দৰ্ভত স্থানীয় ৰাইজে অ’ এন জি চি (ONGC) কৰ্তৃপক্ষক বৃহস্পতিবাৰেই অৱগত কৰিছিল যদিও 24 ঘণ্টাৰ অন্ততহে শুকুৰবাৰে ঘটনাস্থলীত অ’ এন জি চি (ONGC)ৰ বিষয়া উপস্থিত হোৱাৰ অভিযোগ ৰাইজৰ ৷ বৰ্তমান চৰাইদেউ জিলাৰ মাহমৰা চক্ৰৰ চক্ৰ বিষয়া ইণ্ডিকা গগৈৰ নেতৃত্বত আৰক্ষীৰ এটা বৃহৎ দলে সাধাৰণ লোকৰ নিৰাপত্তাৰ স্বাৰ্থত উক্ত পথটোৰ উপৰি তেল নিৰ্গত স্থানসমূহত যাতায়ত সম্পূৰ্ণ ৰূপে বন্ধ কৰি দিছে ৷ ইপিনে তেল নিৰ্গত অঞ্চলটোত শুকুৰবাৰে পুৱা অ’ এন জি চি (ONGC)ৰ এটা বিশেষজ্ঞ দল উপস্থিত হৈ তৈল পৰিবাহী পাইপৰ ফটা অংশ বিচাৰি জেচিবি(JCB) ৰ সহায়ত খনন চলাইছে যদিও তেল নিৰ্গমন বন্ধ কৰিব পৰা নাই ৷ যাৰ বাবে অধিক শংকিত হৈ পৰিছে অঞ্চলটোৰ লোক সকল ৷
উল্লেখনীয় যে, ম্যাদ উকলা পাইপ ব্যৱহাৰ কৰি তেল সৰবৰাহ কৰাৰ ফলতেই এইদৰে বৃহত্তৰ অঞ্চলটোত বাৰে বাৰে এনেকুৱা ঘটনা সংঘটিত হৈ আহিছে বুলি অভিযোগ উত্থাপন কৰিছে ৰাইজে ৷ গতিকে সমগ্ৰ বিষয়টো সন্দৰ্ভত উচিত তদন্ত কৰি ইয়াৰ স্থায়ী সমাধানৰ বাবে দাবী জনাইছে সচেতন ৰাইজে ৷ অন্যথা ভৱিষ্যতে ডাঙৰ ঘটনা সংঘটিত হ'ব বুলি ক্ষোভ প্ৰকাশ কৰিছে স্থানীয় ৰাইজে ৷
লগতে পঢ়কঃ কন্টেইনমেন্ট জ’নত বজাৰ বন্ধ কৰিবলৈ গৈ আক্ৰমণৰ বলি হ’ল আৰক্ষী
