ডিব্ৰুগড়, 26 ছেপ্টেম্বৰ: ৰাষ্ট্ৰপতি দ্ৰৌপদী মুৰ্মুৰ হাতেৰে ৰাষ্ট্ৰীয় বঁটা গ্ৰহণ কৰি গৃহভূমিত উপস্থিত হয় নয়না শইকীয়া ৷ সোমবাৰে বিয়লি ডিব্ৰুগড় বিমানবন্দৰত উপস্থিত হয় নয়না (Nayana Saikia of Dibrugarh achieved National Award) ৷
যোৱা 24 ছেপ্টেম্বৰত National Service Scheme ৰ প্ৰতিষ্ঠা দিৱসৰ উপলক্ষে নতুন দিল্লীৰ ৰাষ্ট্ৰীয় ভৱনত ৰাষ্ট্ৰপতি দ্ৰৌপদী মুৰ্মুৱে (President Draupadi Murmu) ডিব্ৰুগড় বিশ্ববিদ্যালয়ৰ ছাত্ৰী নয়না শইকীয়ালৈ ৰাষ্ট্ৰীয় সেৱা যোজনা পুৰস্কাৰ-২০২০-২১ বঁটা প্ৰদান কৰে ৷
বঁটা গ্ৰহণ কৰি গৃহভূমিত উপস্থিত হোৱা নয়নাই ডিব্ৰুগড় বিমানবন্দৰত সংবাদ মাধ্যমৰ আগত নিজৰ অনুভৱ ব্যক্ত কৰে ৷ প্ৰতি বছৰে দেশৰ ৰাষ্ট্ৰপতিয়ে এন এছ এৰ প্ৰতিষ্ঠা দিৱসৰ উপলক্ষে শ্ৰেষ্ঠ স্বেচ্ছা সেৱকক বাছনি কৰি পুৰস্কাৰেৰে সন্মানিত কৰি আহিছে ৷
এই বৰ্ষত অসমৰ দুগৰাকী এন এছ এছৰ স্বেচ্ছা সেৱকে এই ৰাষ্ট্ৰীয় বঁটা লাভ কৰিবলৈ সক্ষম হৈছে ৷ এই বঁটাত আছে মানপত্ৰ, ৰূপৰ পদক আৰু এক লাখ টকাৰ চেক ৷ ডিগবৈ টিংৰাইৰ ত্ৰিদীপ শইকীয়া আৰু সুৰভী শইকীয়াৰ কন্যা নয়না ডিব্ৰুগড় বিশ্ববিদ্যালয়ত ইংৰাজী বিভাগৰ তৃতীয় ষান্মাসিকৰ ছাত্ৰী ৷
বিশ্ববিদ্যালয়ৰ অমলপ্ৰভা দাস ছাত্ৰী নিৱাসৰ আৱাসী নয়না ডিগবৈ মহাবিদ্যালয়ৰ এন এছ এছৰ স্বেচ্ছাসেৱক আছিল ৷ ইফালে নয়নাৰ কৃতীত্বত উৎফুল্লিত হৈ পৰিছে ডিব্ৰুগড় বিশ্ববিদ্যালয়, ডিগবৈ মহাবিদ্যালয়ৰ শিক্ষক ছাত্ৰ-ছাত্ৰীসকল ৷
লগতে পঢ়ক: সাহিত্য সভাৰ কাৰ্যালয়ত ওলমিল তলা
