মৰাণ, ৭ জুলাই : দুৰ্নীতিৰ বিৰুদ্ধে সৰৱ হৈ পৰিছে ৰাজহ আৰু দুৰ্যোগ প্ৰশমন বিভাগৰ ৰাজ্যিক মন্ত্ৰী যোগেন মহন । দুৰ্নীতিগ্ৰস্ত বিষয়াক নাকী লগাবলৈ সাজু মন্ত্ৰীগৰাকী । দুৰ্নীতিক সমূলঞ্চে নোহোৱা কৰাৰ বাবে কঠোৰ স্থিতি গ্ৰহণ কৰিছে মন্ত্ৰীগৰাকীয়ে ।
তেওঁৰ বিভাগত হোৱা যিকোনো দুৰ্নীতিৰ বিষয়ে এতিয়াৰে পৰা ৰাইজে পোনপটীয়াকৈ মন্ত্ৰীগৰাকীক জনাব পাৰিব । ৰাইজৰ সুবিধাৰ্থে তেওঁ এটা হোৱাটছ এপ নম্বৰ মুকলি কৰিছে । তেওঁৰ নিজা ফেচবুক পেজত হোৱাটছ এপ নম্বৰ মুকলি কৰাৰ কথা ঘোষণা কৰিছে ।
মন্ত্ৰীজনে ৰাইজৰ জ্ঞাতাৰ্থে জনায় যে, এতিয়াৰে পৰা যিকোনো ধৰণৰ অভিযোগ বা তেওঁৰ বিভাগত তেওঁৰ অজানিতে হৈ থকা যিকোনো ধৰণৰ দুৰ্নীতিৰ বিৰুদ্ধে মন্ত্ৰীজনক পোনপটীয়াকৈ হোৱাটছ এপৰ জৰিয়তে জনাব পাৰিব । ৯৩৯৪৯-৩৯০৫৫ নম্বৰত হোৱাটছ এপযোগে বাৰ্তা প্ৰেৰণ কৰি দুৰ্নীতি সম্পৰ্কীয় অভিযোগ বা পৰামৰ্শ মন্ত্ৰীজনক পোনপটীয়াকৈ দিব পাৰিব । এই অভিযোগ বা পৰামৰ্শ মন্ত্ৰীজনে নিজেই নিৰীক্ষণ কৰিব বুলি সদৰী কৰিছে ।
মন্ত্ৰীজনৰ অধীনষ্ঠ বিভাগকেইটা অধিক স্বচ্ছ, নিকা তথা গতিশীল কৰাৰ লক্ষ্যৰে এই পদক্ষেপ লৈছে বুলি তেওঁ জানিবলৈ দিয়ে ৷ লগতে মুখ্যমন্ত্ৰী ড৹ হিমন্ত বিশ্ব শৰ্মাৰ নেতৃত্বত বৰ্তমানৰ চৰকাখনে দুৰ্নীতি, ভ্ৰষ্টাচাৰমুক্ত এখন অসম গঢ়িবলৈ সক্ষম হ'ব বুলিও তেওঁ পোষ্টটোত উল্লেখ কৰে । ইতিমধ্যে বহুকেইটা অভিযোগ লাভ কৰিছে মন্ত্ৰীগৰাকীয়ে ।
এই অভিযোগৰ ভিত্তিত কেইবাটাও বিভাগীয় তদন্ত ঘোষণা কৰা হৈছে । শীঘ্ৰে ইয়াৰ ফলাফল অভিযোগকাৰীয়ে লাভ কৰিব বুলিও তেওঁ জানিবলৈ দিয়ে । মন্ত্ৰীজনৰ বিভাগত হোৱা যি কোনো দুৰ্নীতি সন্দৰ্ভত অভিযোগ দিবলৈ ৰাজহুৱাকৈ আহ্বান জনাইছে মন্ত্ৰীজনে ।
ইফালে ৰাজ্য চৰকাৰৰ বিভিন্ন বিভাগত হোৱা দুৰ্নীতিৰ ক'লা অধ্যায় সময়ে সময়ে উন্মোচিত হৈ আহিছে । বিভাগীয় মন্ত্ৰীসকলে এনে ধৰণৰ পদক্ষেপ গ্ৰহণ কৰিলে দুৰ্নীতিমুক্ত নিকা ব্যৱস্থা আৰম্ভ হোৱাত সহায়ক হ'ব বুলি আশা কৰিছে ৰাইজে । আনহাতে, ৰাজহ মন্ত্ৰীগৰাকীৰ এই মুকলি আহ্বানে একাংশ দুৰ্নীতিগ্ৰস্ত বিষয়াৰ চকুৰ টোপনি হৰিছে ।
লগতে পঢ়ক: ধনশিৰিত ড্ৰাগছসহ আটক ৩
