মৰাণ, 21 আগষ্ট: আজি ৰাজ্যজুৰি অনুষ্ঠিত হয় অসম চৰকাৰৰ চতুৰ্থ বৰ্গৰ পদৰ নিযুক্তি পৰীক্ষা (Recruitment examination in Assam)। ৰাজ্যৰ ২৪ খন জিলাত এই লিখিত পৰীক্ষা অনুষ্ঠিত হয় । পুৱা ১০ বজাৰ পৰা ১২ বজালৈ আৰু দিনৰ ২ বজাৰ পৰা ৪ বজালৈ দুটা ভাগত প্ৰথম পৰ্যায়ৰ পৰীক্ষা সম্পূৰ্ণ হৈ যায় ।
উল্লেখ্য যে, অসমৰ ইতিহাসত পোন প্ৰথমবাৰৰ বাবে 24 খন জিলাত ইন্টাৰনেট সেৱা বন্ধ কৰি অসম চৰকাৰৰ চতুৰ্থ বৰ্গৰ পদৰ নিযুক্তি পৰীক্ষা অনুষ্ঠিত হয় । ৰাজ্যৰ কেইবা হাজাৰ নিবনুৱাই অংশগ্ৰহণ কৰা এই নিযুক্তি পৰীক্ষা সতৰ্কতাৰে আৰু পৰীক্ষাৰ সময়ত যাতে কোনো অশুভ ঘটনা সংঘটিত হ’ব নোৱাৰে তাৰ প্ৰতি লক্ষ্য ৰাখি কটকটীয়া নিৰাপত্তা ব্যৱস্থা কৰিছিল ৰাজ্য চৰকাৰে ।
চতুৰ্থ বৰ্গৰ পৰীক্ষা সন্দৰ্ভত মৰাণত মন্ত্ৰী যোগেন মহনে প্ৰতিক্ৰিয়া প্ৰকাশ কৰি কয়, "স্বচ্ছ নিযুক্তিয়ে ৰাজ্যৰ প্ৰশাসন ব্যৱস্থাক অধিক শক্তিশালী কৰিব । যোগ্যজনক উপযুক্ত স্থানত নিযুক্তি দিয়াৰ বাবে ৰাজ্য চৰকাৰে এই ব্যৱস্থা গ্ৰহণ কৰিছে । ৰাজ্যৰ মুখ্যমন্ত্ৰী হিমন্ত বিশ্ব শৰ্মাই দুৰ্নীতি নিবাৰণৰ বাবে এটা কঠোৰ পদক্ষেপ দাঙি ধৰিছে । এই নিযুক্তিৰ পাছতে ৰাজ্য চৰকাৰ আৰু প্ৰশাসন অধিক আগবাঢ়ি যাব" (Minister Jogen Mohan React on Recruitment examination)।
