ডিব্ৰুগড়, 5 জুনঃ ৰাজ্য চৰকাৰ আৰু Assam Cancer Care Foundationৰ অধীনত,টাটা ট্ৰাষ্টৰ সহযোগিতাত অসম চিকিৎসা মহাবিদ্যালয়ত নিৰ্মাণৰত কৰ্কট চিকিৎসালয়ৰ দুবিধ জৰুৰী সেৱা আনুষ্ঠানিকভাৱে উদ্বোধন কৰে স্বাস্থ্যমন্ত্ৰী হিমন্ত বিশ্ব শৰ্মাই ৷ এই সেৱাৰ জৰিয়তে চিকিৎসালয়ত সদ্যহতে কেম' থেৰাপি আৰু চেপ্তেম্বৰৰ পৰা ৰেডিয়েশ্যনৰ ব্যৱস্থা উপলব্ধ হ'ব ৷ ইতিমধ্যে এই সেৱাৰ বাবে নিযুক্তি দিয়া হৈছে 50 জনীয়া উন্নত চিকিৎসা সেৱাৰ দল ৷
কেইবাটাও কাৰ্যসূচী লৈ শুকুৰবাৰে পুৱা উজনিৰ কেইবাখনো জিলালৈ যোৱা স্বাস্থ্যমন্ত্ৰী গৰাকীয়ে পোন প্ৰথমে অসম চিকিৎসা মহাবিদ্যালয়ত উপস্থিত হৈ এখন পৰ্যালোচনা সভাত অংশগ্ৰহণ কৰে ৷ এই সভাত মন্ত্ৰী সঞ্জয় কিষাণ,সুৰেণ মোহনৰ ওপৰিও ডিব্ৰুগড়,লাহোৱাল,দুলীয়াজান আদি সমষ্টিৰ বিধায়কসকলৰ লগতে, কেইবাটাও বিভাগৰ বিষয়া,অসম চিকিৎসা মহাবিদ্যালয়ৰ অধ্যক্ষসহ কৰ্তৃপক্ষৰ লোক উপস্থিত থাকে ৷ পৰৱৰ্তী সময়ত অসম চিকিৎসা মহাবিদ্যালয়ৰ বহিঃৰোগ বিভাগত এটা স্ক্ৰীনিং কেন্দ্ৰও মুকলি কৰে ৷ তাৰ পিচতেই তেওঁ লাহোৱালৰ আই চি এম আৰত উপস্থিত হৈ কৰ্তৃপক্ষৰে এখন আলোচনাত মিলিত হোৱাৰ লগতে কৰ্তমৰ্তা সকলৰ খবৰ লয় ৷ ইফালে বিশ্ব পৰিৱেশ দিৱস উপলক্ষে স্বাস্থ্য মন্ত্ৰী গৰাকীয়ে আই চি এম আৰত এটি গছপুলিও ৰোপণ কৰে ৷
লগতে পঢ়কঃ বিষ্ণু পুস্কৰৰ মাছ-কাচৰ অস্বাভাবিক মৃত্যুৰ স্থায়ী সমাধান বাবে গুৰুত্বপূৰ্ণ বৈঠক
