মৰাণ, ২ জুন : ক'ভিড পৰিস্থিতিৰ মাজতো সমগ্ৰ ডিব্ৰুগড় জিলাৰ উন্নয়নমূলক কামসমূহ ক্ষিপ্ৰতাৰে কৰাত গুৰুত্ব প্ৰদান কৰিছে জিলা প্ৰশাসনে । যাৰবাবে ডিব্ৰুগড়ৰ উপায়ুক্ত কাৰ্যালয়ৰ সভাকক্ষত জিলা উপায়ুক্ত পল্লৱ গোপাল ঝাৰ সভাপতিত্বত জনস্বাস্থ্য কাৰিকৰী বিভাগৰ কাৰ্যবাহী অভিযন্তাৰ লগতে বিভাগৰ অন্যান্য বিষয়া কৰ্মচাৰীৰ উপস্থিতিত এক গুৰুত্বপূৰ্ণ পৰ্যালোচনা সভাৰ আয়োজন কৰা হয় ।
উক্ত বিভাগৰ অধীনত জিলাখনত ৰূপায়ণ হৈ থকা আঁচনিসমূহ সৰ্ম্পকে এই পৰ্যালোচনা সভাত আলোচনা কৰা হয় । উপায়ুক্ত গৰাকীয়ে জল জীৱন মিচনকে ধৰি বিভাগটোৰ দ্বাৰা ৰূপায়ণ কৰি থকা বিভিন্ন আঁচনিৰ অগ্ৰগতি সৰ্ম্পকে বুজ লয় আৰু বাকী থকা কামসমূহ নিৰ্ধাৰিত সময়ৰ ভিতৰত সম্পাদন কৰিবলৈ বিষয়াসকলক নিৰ্দেশ দিয়ে । উক্ত সভাত জিলা উন্নয়ন আয়ুক্ত পাৰ্থ প্ৰতীম বৈৰাগীৰ লগতে বহু কেইজন জ্যেষ্ঠ প্ৰশাসনিক বিষয়া উপস্থিত থাকে ।
