মৰাণ, ২৪ এপ্ৰিল: দেশজুৰি হোৱা কৰ'ণাৰ কাল সংক্ৰমণত গ্ৰাসিত সকলো । চৰকাৰে বাৰাম্বাৰ দেশবাসীক এই মহামাৰীৰ পৰা উদ্ধাৰৰ বাবে সাৱধানে থাকিবলৈ অনুৰোধ জনাই আহিছে যদিও কোনো কোনো সময়ত একাংশ অসতেন ৰাইজে চৰকাৰৰ আহ্বানক ধূলিসাৎ কৰি আহিছে । বৰ্তমান সময়ত ক'ভিড-১৯ ৰ সংক্ৰমণ প্ৰতিৰোধ কৰাৰ বাবে মাস্ক পৰিধান কৰাটো অতি প্ৰয়োজনীয় । সেয়েহে মৰাণৰ টেঙাখাত ৰাজহ চক্ৰ বিষয়াৰ কাৰ্যালয়ৰ উদ্যোগত আৰু স্থানীয় ৰাইজৰ সহযোগত 'Masses for Masks' অৰ্থাৎ জনতাৰ বাবে মাস্ক নামৰ এক সজাগতা অভিযান আৰম্ভ কৰে ।
ইয়াৰ জৰিয়তে সকলোকে সঠিক ৰূপত মাস্ক পৰিধান কৰা, সামৰ্থ অনুযায়ী যিসকল সদাশয় ব্যক্তিয়ে ইচ্ছা কৰে তেওঁলোকে চক্ৰ বিষয়াৰ কাৰ্যালয়ত এন ৯৫ (N95) বা ইয়াৰ সমকক্ষ মাস্ক দান কৰিব পাৰিব । এই মাস্কসমূহ আৰ্থিকভাবে দুৰ্বল লোক, যিয়ে দৈনিক কৰ্তব্যৰ খাতিৰত ঘৰৰ পৰা বাহিৰলৈ ওলাই যাব লাগে তেওঁলোকক সংশ্লিষ্ট গাওঁবুঢ়াসকলৰ জৰিয়তে উক্ত মাস্কসমূহ প্ৰদান কৰাৰ বাবে ব্যৱস্থা কৰা হৈছে ।
এই অভিযানক ৰাইজে আদৰি লোৱাৰ লগতে সাধ্যানুসৰি বহু দল, সংগঠন আৰু ব্যক্তিয়ে ইতিমধ্যে চক্ৰ বিষয়াৰ কাৰ্যালয়ত মাস্কসমূহ দান কৰিছে আৰু সেই মাস্কসমূহ ইতিমধ্যে ৰাইজৰ মাজত বিতৰণ কৰা হৈছে । উদ্যোক্তাসকলে টেঙাখাট আৰু দুলীয়াজানবাসী ৰাইজক সহযোগিতাৰ বাবে আহ্বান জনাইছে ।
লগতে পঢ়ক: দলগাঁৱত চোৰৰ চাফাই অভিযান
