ডিব্ৰুগড়,18 মে’: ক’ভিডকালীন পৰিস্থিতিৰ সময়ত ছাত্ৰ-ছাত্ৰীসকল ঘৰতে আৱদ্ধ হৈ থকাৰ অৱস্থাত ডিব্ৰুগড় বিশ্ববিদ্যালয়ৰ ঐতিহ্যমণ্ডিত ছাত্ৰ নিৱাস মফিজুদ্দিন আহমেদ হাজৰিকা ছাত্ৰ নিৱাসৰ এক উল্লেখনীয় প্ৰচেষ্টা গ্ৰহণ ৷ মফিৰ উদ্যোগত সদৌ অসম ভিত্তিত অসমীয়া সাহিত্য জগতৰ মহীৰূহ তথা বিশিষ্ট সাংবাদিক, কবি, সমালোচক হোমেন বৰগোহাঞিৰ সোঁৱৰণত ৰাজ্যিক পৰ্যায়ৰ সাহিত্য আৰু সুকুমাৰ কলা প্ৰতিযোগিতা অনুষ্ঠিত কৰা হ’ব ৷ এই কথা প্ৰকাশ কৰিছে প্ৰতিষোগিতাসমূহৰ দায়িত্বত থকা ছাত্ৰ-ছাত্ৰীসকলে ৷
সদৌ অসম ভিত্তিত অনুষ্ঠিত হ’বলগীয়া প্ৰতিযোগিতাসমূহ হৈছে- প্ৰবন্ধ প্ৰতিযোগিতা, চিত্ৰাংকন প্ৰতিযোগিতা আৰু কবিতা প্ৰতিযোগিতা ৷ ইয়াৰে প্ৰবন্ধ প্ৰতিযোগিতাৰ বিষয় হৈছে -‘ক’ভিডকালীন পৰিস্থিতিত অসমৰ সাম্প্ৰতিক শিক্ষা ব্যৱস্থাৰ ওপৰত পৰা প্ৰভাৱ: প্ৰত্যাহ্বান আৰু প্ৰত্যাশা’, একেদৰে চিত্ৰাংকন প্ৰতিযোগিতাৰ বিষয় হৈছে: ‘নাৰী সুৰক্ষা আৰু সবলীকৰণ’ আৰু কবিতাৰ বিষয় স্ব-নিৰ্বাচিত বুলি জানিবলৈ দিছে ৷
উল্লেখ্য যে, প্ৰতিযোগীসকলে তেওঁলোকৰ লিখনিসমূহ জমা দিয়াৰ অন্তিম দিন ৩০ জুন ৷ প্ৰতিযোগীসকলে হোৱাটচ এপ আৰু ই-মেইলযোগে লেখাসমূহ প্ৰেৰণ কৰিব পাৰিব ৷
আনহাতে, প্ৰথম, দ্বিতীয় আৰু তৃতীয় স্থান বিজয়ীসকলক প্ৰাইজমানি আৰু প্ৰমাণ পত্ৰ প্ৰদান কৰা হ’ব ৷ মফিজুদ্দিন আহমেদ হাজৰিকা ছাত্ৰ নিৱাসে তেওঁলোকৰ এই অনুষ্ঠানত সকলোৰে সহায়-সহযোগিতা কামনা কৰিছে ৷
লগতে পঢ়ক : মিজোৰামত ক’ভিড চেণ্টাৰত স্বেচ্ছামূলক সেৱা নাৰ্চিঙৰ ছাত্ৰীৰ
