মৰাণ, 26 জুন : ৰাজ্যজুৰি চাইবাৰ অপৰাধীৰ বিৰুদ্ধে অভিযান অব্যাহত আছে ৷ ইয়াৰ মাজতে এইবাৰ ডিব্ৰুগড়ত চাইবাৰ অপৰাধীৰ নতুন কৌশল ৷ এইবাৰ ডিব্ৰুগড়ত CRPF জোৱানৰ নামত ফেক একাউণ্ট খুলি প্ৰৱঞ্চনাৰ বৃহৎ জাল পেলাইছে একাংশ অসাধু চক্ৰই ৷ সামাজিক মাধ্যমত প্ৰলোভন দি লুটিছে লাখ লাখ টকা ৷ শেহতীয়াকৈ সক্ৰিয় হৈ উঠা এই দালাল চক্ৰই নিদ্ৰা হৰণ কৰিছে এতিয়া ডিব্ৰুগড় আৰক্ষীৰ ৷
ঘটনা অনুসৰি এই চক্ৰটোৱে প্ৰথমতে সামাজিক মাধ্যমত অতি কৌশলপূৰ্ণভাৱে টাৰ্গেট কৰি লয় সহজ সৰল লোকক ৷ চতুৰ চক্ৰটোৱে স্থানীয় থানাৰ আৰক্ষী বিষয়া বা কোনো সম্ভ্ৰান্ত লোকৰ নামত ফেচবুকত একাউণ্ট খুলি প্ৰথমে ফ্ৰেণ্ড ৰিকুৱেষ্ট পঠিয়ায় ৷ বন্ধুত্বৰ প্ৰস্তাৱ গ্ৰহণ কৰাৰ পিচতেই মেচেঞ্জাৰত সেই লোকজনৰ নম্বৰ বিচাৰে ৷ ইয়াৰ পাচতে হোৱাটছ এপযোগে আৰম্ভ হয় ঠগ প্ৰৱঞ্চনাৰ আচল খেলা ৷
পোন প্ৰথমে হোৱাটচ এপত গতানুগতিক কথা বাৰ্তা চলিব ৷ ইয়াৰ মাজতে আহে এটা মেছেজ৷ "মোৰ এজন চিনাকি CRPF বিষয়াৰ চাকৰিৰ স্থান বদলি হৈছে৷ তেওঁ কোৱাৰ্টাৰত ব্যৱহৃত সামগ্ৰী টিভি, ফ্ৰীজ, ৱাচিং মেচিন, বিচনা, আলমাৰি আদি কম মূল্যতে বিক্ৰী কৰিব খুজিছে ৷ আপুনি ল'বলৈ ইচ্ছুক নেকি ৷" এই মেছেজৰ পিচতেই আপোনালৈ পঠাব আচবাবসমূহৰ ফটো ৷
আচবাবসমূহৰ ফটোসমূহ দেখি আপুনি দামৰ কথা সুধিলেই জালত পৰাটো নিশ্চিত ৷ এই কথা খোদ জানিবলৈ দিয়ে ডিব্ৰুগড় জিলাৰ লাহোৱালৰ এজন ভুক্তভোগীয়ে ৷ ডিব্ৰুগড়ৰ লাহোৱালৰ এজন যুৱক পৰিছিল এই চক্ৰটোৰ জালত ৷ যুৱকজনক আচবাবখিনিৰ মূল্য একাউণ্টত দিবলৈ কোৱাৰ পিচতে তেওঁৰ সন্দেহ উপজে ৷ লগে লগে তেওঁ স্থানীয় আৰক্ষী বিষয়াজনৰ সৈতে যোগাযোগ কৰাত উৰহি গছৰ ওৰ ওলাই পৰে ৷
আৰক্ষী বিষয়াজনে এই কথা শুনি যুৱকজনক ধন দিবলৈ মানা কৰি এনেদৰে তেওঁৰ নামত ভুৱা একাউণ্ট খুলি অন্য লোকৰ পৰাও প্ৰায় 86 হাজাৰ ধন বিচৰাৰ কথা প্ৰকাশ কৰে ৷
জানিব পৰা মতে এই ভুৱা একাউণ্টৰ জড়িয়তে চক্ৰটোৱে বহু লোকক জালত পেলাই লাখ লাখ টকা লুটি অহা বুলি অৱগত কৰে ৷ তাৰ পিচতে ভুক্তভোগী যুৱকজনে আৰক্ষীৰ কাষ চাপে ৷ ইতিমধ্যে ডিব্ৰুগড় আৰক্ষীয়ে চক্ৰটোক কৰায়ত্ত কৰিবলৈ অভিযান চলাই আছে যদিও বৰ্তমানলৈকে সফল হ'ব পৰা নাই ৷
লগতে পঢ়ক: Kerala murder case : মালিকনীত হত্যা কৰি পলায়ন, ২৭ বছৰৰ পাছত পুনৰ গ্ৰেপ্তাৰ পৰিচাৰিকা
