মৰাণ, ৮ জুন: ডিব্ৰুগড় জিলাৰ দুলীয়াজান বিধানসভা সমষ্টি (Duliajan Constituency) ত থকা টেঙাখাত মহাত্মা গান্ধী আদৰ্শ চিকিৎসালয়ত দিনে-নিশাই ৰোগীক চিকিৎসা সেৱা আগবঢ়াই অহা হৈছে যদিও জৰুৰী সেৱাৰ বাবে এই চিকিৎসালয়খনত নাই পৰ্যাপ্ত এম্বুলেঞ্চ(Ambulance)ৰ ব্যৱস্থা ৷
সেয়ে, জৰুৰীকালীন সেৱাৰ ক্ষেত্ৰত সহায়ক হোৱাকৈ চিকিৎসালয়খনত এখন এম্বুলেঞ্চ(Ambulance) প্ৰদান কৰিছে দুলীয়াজান অইল ইণ্ডিয়া লিমিটেডে(Oil India Limited) । চিকিৎসালয় কৰ্তৃপক্ষই দুলীয়াজান অইল ইণ্ডিয়া লিমিটেডক জনোৱা আবেদন মৰ্মে প্ৰায় ৯ লাখ টকা ব্যয় সাপেক্ষে এই এম্বুলেঞ্চখন ক্ৰয় কৰা হয় ।
মঙলবাৰে টেঙাখাত মহাত্মা গান্ধী আদৰ্শ চিকিৎসালয়ৰ অধীক্ষক ডাঃ ফনীন্দ্ৰ নাথ সোণোৱাল(Dr. Phanindra Nath Sonowal)ক অইলৰ হৈ জনসম্পৰ্কৰক্ষী বিষয়া ত্ৰিদিৱ হাজৰিকা আৰু প্ৰাঞ্জল নেওগে এম্বুলেঞ্চখন আনুষ্ঠানিক ভাৱে প্ৰদান কৰে । অইল ইণ্ডিয়া লিমিটেডৰ এই সহায়ে চিকিৎসালয়খনৰ লগতে টেঙাখাতবাসীৰ এটি বহু দিনীয়া অভাৱ পূৰণ কৰিছে ৷
চিকিৎসালয় আৰু অইল কৰ্তৃপক্ষৰ এনে মহান পদক্ষেপৰ বাবে স্থানীয় ৰাইজে সন্তুষ্টি প্ৰকাশ কৰিছে ৷ এতিয়া জৰুৰীকালীন সময়ত কোনো ৰোগীয়ে এম্বুলেঞ্চৰ অভাৱত হাৰাশাস্তি ভূগিবলগীয়া নহয় । অইল ইণ্ডিয়া লিমিটেড (OIL)ৰ এই পদক্ষেপৰ বাবে টেঙাখাত মহাত্মা গান্ধী আদৰ্শ চিকিৎসালয়ৰ অধীক্ষকগৰাকীয়ে ধন্যবাদ জ্ঞাপন কৰিছে ।
লগতে পঢ়ক:কেবিনেট বৈঠকত কেইবাটাও গুৰুত্বপূৰ্ণ সিদ্ধান্ত গ্ৰহণ
