ডিব্ৰুগড়, 22 অক্টোবৰঃ শাসনাধীন চৰকাৰখনে সময়ে সময়ে দুৰ্নীতি আৰু চিণ্ডিকেটৰ ক্ষেত্ৰত শূণ্য সহনশীলতাৰ কথা কয় যদিও মুখ্যমন্ত্ৰীগৰাকীৰ গৃহ জিলাতে একাংশ অসাধু চক্ৰই বন বিভাগৰ সৈতে লগ হৈ চলাই আছে চোৰাং কাঠৰ ৰমৰমীয়া বেহা ৷ ডিব্ৰুগড় চহৰৰ নিচেই কাষতে মাইজান ঘাটত এক অসাধু চক্ৰই মজুত কৰি ৰাখিছে বৃহৎ পৰিমাণৰ চোৰাং কাঠ ৷ ডিব্ৰু ছৈখোৱা ৰাষ্ট্ৰীয় উদ্যান আৰু অৰুণাচল প্ৰদেশ আদিৰ পৰা চোৰাংকৈ বৃহৎ চালি সাজি কঢ়িয়াই অনা হয় এই কাঠ সমূহ ৷ এনে দৰে চালি সাজি অনা কাঠৰ কুণ্ডা সমূহ পিছত চহৰৰ বিভিন্ন কাঠৰ মিলত যোগান ধৰা হয় ৷ সোমবাৰে বিয়লি অসম বিধানসভাৰ বিৰোধী দলপতি দেৱব্ৰত শইকীয়া,বিধায়ক ৰূপজ্যোতি কুৰ্মী,বিধায়ক দুৰ্গা ভূমিজ,প্ৰাক্তন মন্ত্ৰী অটুৱা মুণ্ডাসহ এটা সজাতি দল এক বিশেষ কাৰ্যসূচীলৈ ডিব্ৰুগড়ৰ মাইজান ঘাটলৈ আহোতে নৈৰ কাষত মজুত কৰি ৰখা বৃহৎ পৰিমাণৰ চোৰাং কাঠসমূহ দৃষ্টি গোচৰ হয় ৷
আনহাতে,এক বৃহৎ সংখ্যক নিৰাপত্তাৰক্ষী লৈ অকস্মাতে দলটো মাইজান ঘাটত উপস্থিত হোৱাত সেই স্থানত থকা চোৰাং কাঠ সৰবৰাহকাৰী সকল উক্ত স্থান এৰি পলাই যায় ৷ সঁজাতি দলটোৱে অঞ্চলটো পৰিদৰ্শন কৰি শ শ মূল্যবান চোৰাং কাঠৰ কুণ্ডা প্ৰত্যক্ষ কৰে আৰু তৎক্ষণাত উপায়ুক্ত আৰু বন বভাগক অৱগত কৰে ৷
