মৰাণ,১৭ মাৰ্চ: বুধবাৰে চৰাইদেউ জিলাৰ ১০৬ নং সোণাৰি বিধানসভা সমষ্টিৰ বিজেপি প্ৰাৰ্থী ধৰ্মেশ্বৰ কোঁৱৰৰ হৈ নিৰ্বাচনী প্ৰচাৰ চলালে মুখ্যমন্ত্ৰী সৰ্বানন্দ সোণোৱালে । নিৰ্বাচনী প্ৰচাৰ সভাত উপস্থিত থাকে সাংসদ তপন কুমাৰ গগৈ, ৰামেশ্বৰ তেলী, জ্যেষ্ঠ বিজেপি নেতা অনুপ সিং ৰাজপুৰোহিত, সোণাৰি সমষ্টিৰ বিধায়িকা নৱনীতা সন্দিকৈৰ লগতে দলীয় নেতা-কৰ্মীসকল ।
নিৰ্বাচনী প্ৰচাৰ সভাত অংশ লৈ মুখ্যমন্ত্ৰীগৰাকীয়ে কয় যে, ২০১৬ত বিজেপিয়ে দিয়া প্ৰতিশ্ৰুতি পূৰণৰ বাবে চৰকাৰে প্ৰয়াস কৰিছে । লগতে আত্মসহায়ক গোটৰ মহিলাসকলকো চৰকাৰৰ পৰা ধনৰাশি লাভৰ বাবে উৎকোচ দিবলগীয়া হৈছে নেকি বুলি প্ৰশ্ন কৰে মুখ্যমন্ত্ৰী সোণোৱালে । কংগ্ৰেছৰ শাসন কালত চাকৰিৰ নিযুক্তি, জব কাৰ্ড বিতৰণকে ধৰি সকলো কামৰ বাবে ৰাইজৰ পৰা দালালে ধন সংগ্ৰহ কৰিছিল বুলিও মুখ্যমন্ত্ৰীগৰাকীয়ে সমালোচনা কৰে ।
উল্লেখ্য যে, নিবাৰ্চনৰ দিন চমু চাপি অহাৰ লগে লগে সোণাৰিত এতিয়া ভিৰ কৰিছে হাই প্ৰফাইল নেতাই । বুধবাৰে কংগ্ৰেছ প্ৰাৰ্থী সুশীল চুড়ীৰ হৈ ছট্টিশগড়ৰ মুখ্যমন্ত্ৰী ভূপেশ বাঘেলেও ১০৬ নং সোণাৰি বিধানসভা সমষ্টিত নিৰ্বাচনী প্ৰচাৰ চলায় । সমষ্টিটোৰ টাওকাক চাহ বাগিচাত প্ৰচাৰ চলাই ছত্তিশগড়ৰ মুখ্যমন্ত্ৰী গৰাকীয়ে ।
লগতে পঢ়ক: চিদলীত নিৰ্দলীয় প্ৰাৰ্থী জেছায়া চাম্প্ৰামাৰীৰ মনোনয়ন দাখিল
