মৰাণ,15 চেপ্তেম্বৰ: দেওবাৰে গৃহ জিলা ডিব্ৰুগড়ৰ মৰাণ নগৰত উপস্থিত হৈ প্ৰায় তেৰ কোটি নব্বৈ লাখ টকা ব্যয় সাপেক্ষে নিৰ্মাণ হ’বলগীয়া তিনিটা প্ৰকল্পৰ আধাৰশিলা স্থাপন কৰে মুখ্যমন্ত্ৰী সৰ্বানন্দ সোণোৱালে ৷ মৰাণ নগৰৰ ৩৭ নং ৰাষ্ট্ৰীয় ঘাই পথৰ ৩.৫ কিলোমিটাৰ দৈৰ্ঘৰ উন্নীতকৰণ আৰু সৌন্দৰ্য বৰ্ধন,মৰাণ নগৰৰ মাজ মজিয়াত দহ লাখ টকা ব্যয় সাপেক্ষে চাওলুং চুকাফাৰ প্ৰৰ্তিমূৰ্তি স্থাপন আৰু ত্ৰিশ লাখ টকা ব্যয় সাপেক্ষে হাটখোলাত অৱস্থিত মৰাণ শিশু উদ্যানৰ উন্নীতৰণ আৰু সৌন্দৰ্য বৰ্ধনৰ আঁচনিৰ আধাৰশিলা স্থাপন কৰি বিয়লি ৩ বজাত মুখ্যমন্ত্ৰী সোণোৱালে মৰাণৰ চক্ৰ বিষয়াৰ কাৰ্যালয় চৌহদত অনুষ্ঠিত এখন সভাত অংশগ্ৰহণ কৰে ৷ মুখ্যমন্ত্ৰী গৰাকীয়ে সভাত বিগত পাঁচ বছৰে সমগ্ৰ ভাৰতবৰ্ষত প্ৰধানমন্ত্ৰী নৰেন্দ্ৰ মোডীৰ নেতৃত্বত বিজেপি চৰকাৰে আমূল পৰিৱৰ্তন আনিবলৈ সক্ষম হৈছে বুলি নিজৰ বক্তব্য দাঙি ধৰে ৷ তেওঁ লগতে কয় যে পূৰ্বৰ চৰকাৰে চিন্তা কৰিব নোৱাৰা কাম বৰ্তমানৰ চৰকাৰখনে কৰি পাহাৰ-ভৈয়াম,বৰাক-ব্ৰহ্মপুত্ৰ উপত্যকাকে ধৰি 33 খন জিলাৰ সকলো ঠাইতে বসবাস কৰা সৰ্বস্তৰৰ ৰাইজৰ কল্যাণ-উন্নয়নত আত্মনিয়োগ কৰিছে বুলি তেওঁ উল্লেখ কৰে ৷
ভাৰতীয় জনতা পাৰ্টিৰ খোৱাং ব্লক মণ্ডলৰ সভাপতি ভাস্কৰজ্যোতি বৰুৱাই আঁত ধৰা সভাখনত কেন্দ্ৰীয় মন্ত্ৰী ৰামেশ্বৰ তেলী,মৰাণ আৰু টিংখাঙৰ বিধায়কদ্বয় ক্ৰমে চক্ৰধৰ গগৈ আৰু বিমল বৰা,এন এইচ আই ডি চি এলৰ কাৰ্যবাহী সঞ্চালক অজয় আলুলিয়া,ডিব্ৰুগড়ৰ উপায়ুক্ত পল্লৱ গোপাল ঝাকে আদি কৰি কেইবাগৰাকীও বিশিষ্ট ব্যক্তিয়ে অংশগ্ৰহণ কৰে ৷ ইফালে সভাত অংশগ্ৰহণ কৰাৰ পূৰ্বে মুখ্যমন্ত্ৰীগৰাকীয়ে মৰাণৰ জনমংগল আদৰ্শ অন্ধ বিদ্যালয়ত উপস্থিত হৈ বিদ্যালয়খন পৰিভ্ৰমণ কৰাৰ লগতে ছাত্ৰ-ছাত্ৰীসকলৰ মাজত ফল-মূল বিতৰণ কৰে ৷
