মৰাণ, ১৬ ফেব্ৰুৱাৰী: পৰ্যটকক আকৰ্ষিত কৰিবলৈ ডিব্ৰুগড়ৰ জকাই সংৰক্ষিত বনাঞ্চলত গঢ়ি তোলা হৈছে সাহিত্য মণিষী উপবন । সুন্দৰ প্ৰাকৃতিক পৰিৱেশৰ মাজত পৰ্যটকক অনাবিল শান্তি দিয়াৰ উদ্দেশ্যে আৰু শিল্প-সাহিত্যৰ জগতলৈ বৰঙণি আগবঢ়াই যোৱা মণিষীসকলৰ সোঁৱৰণত স্থাপন কৰা হৈছে সাহিত্য মণিষী উপবন । নানা ফুল, গছ-গছনিৰে ভৰপূৰ সাহিত্য মণিষী উপবনৰ মনোমোহা সৌন্দৰ্যই এতিয়া হাতবাউল দি মাতিছে পৰ্যটকক । ২০২০-২১ বৰ্ষৰ 'CAMPA'আঁচনিৰ অধীনত ৩ হেক্টৰ ভূমিত গঢ়ি তোলা হৈছে উদ্যানখন ।
সোমবাৰে সাহিত্য মণিষী উপবন আনুষ্ঠানিকভাৱে উদ্বোধন কৰা হয় । স্থানীয়ভাৱে সংগ্ৰহ কৰা বহু অৰ্কিড, মূল্যৱান গছ, ঔষধি গছ ৰোপণ কৰাৰ লগতে এখন আটকধুনীয়া ফুল, ফল-মূলৰ বাগিছা স্থাপন কৰা হৈছে যাতে দূৰ-দূৰণিৰ পৰা অহা পৰ্যটকৰ বাবে আকৰ্ষণৰ কেন্দ্ৰ বিন্দু হৈ পৰে । লগতে উদ্যানখনত বাঁহেৰে আটোমটোকাৰিকৈ এটা গৃহ নিৰ্মাণ কৰা হৈছে । এতিয়া পথেৰে যোৱা লোকসকলে সাহিত্য মণিষী উপবনৰ সৌন্দৰ্য উপভোগ কৰাৰ লগতে আলোকচিত্ৰ সংগ্ৰহ কৰি আনন্দিত হৈ পৰিছে ।
লগতে পঢ়ক:প্ৰণৱ কুমাৰ গগৈৰ মুক্তিৰ দাবী টাই আহোম ছাত্ৰ সন্থাৰ
