ডিব্ৰুগড়, 23 আগষ্ট: ডিব্ৰুগড়ৰ এখন ব্যতিক্ৰমী গাঁও ৷ এই গাঁওখনত নিষিদ্ধ অনা-অসমীয়া তথা হিন্দীভাষী লোক (Non Assamese people) ৷ নিজৰ মাটি-ভেঁটিৰ সুৰক্ষাৰ স্বাৰ্থত ডিব্ৰুগড় জিলাৰ মৰাণ ৰাজহ চক্ৰৰ অন্তৰ্গত টিংখাং সমষ্টিৰ নখাট গাঁৱৰ ৰাইজে অনা-অসমীয়া হিন্দী ভাষী ব্যক্তিক মাটি ক্ৰয় আৰু বিক্ৰীৰ বাবে সম্পূৰ্ণ নিষিদ্ধ অঞ্চলৰূপে ঘোষণা কৰিছে (Ban on purchase and sale of land in Sonowal Kachari populated area) ৷
বিগত বিভিন্ন সময়ত সদৌ অসম সোণোৱাল ছাত্ৰ সন্থাই সোণোৱাল কছাৰী অধ্যুষিত অঞ্চলসমূহৰ লগতে ৰাজ্যৰ জনজাতীয় অঞ্চলসমূহত অনা অসমীয়া লোক তথা হিন্দীভাষী লোকক ভূমি ক্ৰয়-বিক্ৰয় কৰাত বাধা প্ৰদান কৰি আহিছিল (Non Assamese people Ban on purchase and sale of land ) ৷ এই সন্দৰ্ভত বিভিন্ন প্ৰতিবাদী কাৰ্যসূচীৰ লগতে চৰকাৰকো আহ্বান জনাইছিল ছাত্ৰ সন্থাৰ সদস্যসকলে ৷ ডিব্ৰুগড় জিলাৰ মৰাণ ৰাজহ চক্ৰৰ অন্তৰ্গত টিংখাং সমষ্টিৰ নখাট গাঁওখন সোণোৱাল কছাৰী অধ্যুষিত অঞ্চল (Sonowal Kachari populated area) ৷ কিন্তু শেহতীয়াকৈ এইখন গাঁৱৰে বাসিন্দা জোৎস্না বৰা নামৰ মহিলাগৰাকীয়ে নিজ ভূমি বনিকগোষ্ঠীৰ কোনো লোকক বিক্ৰী কৰা বুলি জানিবলৈ পাইছিল গাঁওখনৰ লোকে ৷
এই কথা পোহৰলৈ অহাৰ লগে লগে গাওঁখনত উত্তপ্ত পৰিস্থিতিৰ সৃষ্টি হয় ৷ মাটি-ভেঁটিৰ সুৰক্ষাৰ স্বাৰ্থত প্ৰতিবাদমুখৰ হৈ পৰিছে নখাট গাঁওবাসী ৷ সোমবাৰে নখাট গাঁও পৰিচালনা সমিতি, তৰুণজ্যোতি যুৱক সংঘ, নখাট মহিলা সমিতি, নখাট গাঁও নামঘৰ পৰিচালনা সমিতিয়ে এক প্ৰতিবাদী কাৰ্যসূচী ৰূপায়ণ কৰে ৷
প্ৰতিবাদী ৰাইজে কয় "অনা অসমীয়াক আমি স্থান দিবলৈ বিচৰা নাই আৰু নিবিচাৰো ৷ আমি এই সন্দৰ্ভত স্থানীয় বিধায়কৰ লগতে বিভাগলৈ আবেদন জনাইছিলো ৷ তেওঁলোকে আমাক আগবাঢ়ি যাবলৈ আশ্বাস দিছে, সেইমতে আমি আগবাঢ়িছো ৷ তেওঁলোক আমাৰ লগত আছে ৷"
"শ্ৰীমতী জোৎস্না বৰালৈ এটাই অনুৰোধ কৰিব বিচাৰো ৷ আমি শুনিছো যে তেওঁ বনিক গোষ্ঠীক ভূমি বিক্ৰী কৰিছে ৷ সেই ভূমি ঘূৰাই লোৱাৰ এটা ব্যৱস্থা কৰক ৷" প্ৰতিবাদকাৰীসকলে কোনোপধ্যেই নখাট গাঁৱৰ ভূমি কোনো বহিৰাগত লোকক প্ৰদান কৰা নহ’ব বুলি এইদৰে মহিলগৰাকীক সকিয়নী প্ৰদান কৰে ৷
মন কৰিবলগীয়া যে বহিৰাগত বনিয়া গোষ্ঠীয়ে এতিয়া নগৰ-চহৰৰ ওপৰিও বিশেষকৈ গ্ৰাম্যাঞ্চলৰ মাটি লক্ষ্য কৰি লোৱা বুলি ৰাইজে অভিযোগ উত্থাপন কৰে । আনহাতে, সদৌ অসম সোণোৱাল কছাৰী ছাত্ৰ সন্থাইয়ো অনা-অসমীয়া লোকক কোনো কাৰণতে সোণোৱাল কছাৰী অধ্যুষিত অঞ্চলত মাটি ক্ৰয়-বিক্ৰী কৰা কাৰ্য মানি লোৱা নহ'ব বুলি উল্লেখ কৰাৰ লগতে এনে কাৰ্যৰ বিৰুদ্ধে সদায়ে মাত মাতি যাব বুলি উল্লেখ কৰে ৷
সদৌ অসম সোণোৱাল কছাৰী ছাত্ৰ সন্থাৰ সাধাৰণ সম্পাদক বুধিন সোণোৱালে কয়, "এইটো অতি পৰিতাপৰ বিষয় ৷ আমি পূৰ্বেও কৈছো যে সোণোৱাল কছাৰীকে ধৰি জনজাতি লোকসকলৰ অধ্যুষিত অঞ্চলসমূহত অনা অসমীয়া লোকক ভূমি বেচা কিনাটো বন্ধ কৰিব লাগে ৷ আজি নখাট গাঁৱলৈ আহি আমি দেখিছো এগৰাকী মহিলাই অনা অসমীয়া লোকক ভুমি বিক্ৰী কৰিছে ৷ এই কথাত আমি সদৌ অসম সোণোৱাল ছাত্ৰ সন্থাই অতি দুখ পাইছো ৷ আমি আহ্বান জনাইছো প্ৰশাসনক ৰাইজে দিয়া স্মাৰকপত্ৰখনৰ ভিত্তিত এই সন্দৰ্ভত বিহিত ব্যৱস্থা লব লাগে ৷ ইয়াৰ ক্ষেত্ৰত আমি তীব্ৰ প্ৰতিবাদ কৰিম ৷"
লগতে পঢ়ক: ১৩ কোটি টকা খৰচৰ পিছতো নিশা অন্ধকাৰত ডুব যায় গুৱাহাটী
