মৰাণ, ৫ জানুৱাৰী: কৰ'ণা মহামাৰীৰ সংক্ৰমণৰ ভয়াৱহতা কম হোৱাৰ লগে লগে ৰাজ্যৰ অন্য জিলাসমূহৰ লগতে ডিব্ৰুগড়তো বিদ্যালয়-মহাবিদ্যালয়সমূহত যোৱা ১ জানুৱাৰীৰ পৰা পাঠদান আৰম্ভ হৈছে । বিদ্যালয়সমূহত পাঠদান কৰাক লৈ শিক্ষা বিভাগে কিছু নীতি-নিয়ম নিৰ্ধাৰণ কৰি দিছে । এতিয়া জিলাখনৰ বিদ্যালয়সমূহ সঠিকভাৱে পৰিচালিত হৈছে নে নাই সেই বিষয়ে আলোচনা কৰিবলৈ মঙলবাৰে ডিব্ৰুগড়ত জিলা উপায়ুক্তৰ কাৰ্যালয়ত এখন পৰ্যালোচনা সভা অনুষ্ঠিত হয় ।
উপায়ুক্ত কাৰ্যালয়ৰ সভাকক্ষত অনুষ্ঠিত এই সভাত শিক্ষা বিভাগৰ কাম কাজৰ পৰ্যালোচনা কৰে জিলা উপায়ুক্ত পল্লৱ গোপাল ঝাই ৷ এই বিষয়ে শিক্ষা বিষয়াৰে আলোচনা কৰে । শেহতীয়াকৈ বিদ্যালয়সমূহত পাঠদান প্ৰক্ৰিয়া পুনৰ আৰম্ভ হোৱাৰ পিছত বিদ্যালয়ত ছাত্ৰ-ছাত্ৰীৰ উপস্থিতিৰ হাৰ,ছাত্ৰ-ছাত্ৰীয়ে অভিভাৱকৰ অনুমতি পত্ৰ জমা দিছেনে নাই,বিদ্যালয়সমূহ চাফ-চিকুণ কৰি ৰখা হৈছেনে নাই আদি বিষয়ত আলোচনা কৰা হয় ৷
শিক্ষা বিভাগে নিৰ্ধাৰণ কৰি দিয়া সকলো নীতি-নিয়ম পালন কৰি পাঠদান প্ৰক্ৰিয়া চলাই নিবলৈ নিৰ্দেশ দিয়ে জিলা উপায়ুক্তগৰাকীয়ে । সভাত অতিৰিক্ত উপায়ুক্ত নন্দিতা বৰুৱাও উপস্থিত থাকে ।
লগতে পঢ়ক:কাৰ্বি আংলঙত পৰাম্পৰাগত ৰংকেৰ পূজা পালন
