মৰাণ, ২৪ জুন : এতিয়া খেতিৰ বতৰ । সেয়ে পথাৰত ব্যস্ত হৈ পৰিছে সকলো কৃষক । কিন্তু তাৰ মাজতে ডিব্ৰুগড় জিলাৰ ধেমেচীত দেখা গৈছে এক ব্যতিক্ৰমী দৃশ্য । এবিঘা দুবিঘাকৈ হাল বাই গৈছে এখন ট্ৰেক্টৰে ।
কিন্তু ট্ৰেক্টৰ চালকগৰাকী কোনো পুৰুষ নহয় । চালকৰ আসনত এগৰাকী যুৱতীহে । মনোৰঞ্জনৰ বাবে তেওঁ ট্ৰেক্টৰ চলোৱা নাই । পথাৰত পিতৃক সহায়ৰ বাবে এনেদৰে নিতৌ চলাইছে ট্ৰেক্টৰ ।
প্ৰতিদিনে ১০ ৰ পৰা ১৫ বিঘা মাটি হাল বাই এইগৰাকী দশমমানৰ ছাত্ৰী আয়ত্ৰীয়ে । ১১ বছৰৰ পৰাই ট্ৰেক্টৰ চলাবলৈ শিকা আয়ত্ৰীয়ে এতিয়া খেতিৰ বতৰত পিতৃক সহায় কৰিছে । ইফালে ৪ টা সন্তানৰ পিতৃও আজি সুখী ।
দুখন ট্ৰেক্টৰলৈ পৰিয়াল পোহ পাল দিয়া গজেন চৌধুৰী আজি গৌৰৱান্বিত তেওঁৰ কন্যাকলৈ । শিক্ষানুষ্ঠানসমূহ বন্ধ হৈ থকাত অনলাইনযোগে আয়ত্ৰীয়ে পঢ়া শুনা কৰি আছে । কিন্তু তাৰ উপৰিও ট্ৰেক্টৰ চলোৱাৰ লগতে আৰু মাতৃক কামত সহায় কৰি দিছে আয়ত্ৰীয়ে । মুঠতে সকলো দিশৰ পৰা পাৰ্গত আয়ত্ৰী ।
বৰ্তমান সময়ত কৃষি কৰ্মৰ প্ৰতি আগ্ৰহ নাই নৱপ্ৰজন্মৰ কিন্তু তেনে সময়তে এইগৰাকী ছাত্ৰী আয়ত্ৰী এতিয়া বহুতৰে প্ৰশংসাৰ পাত্ৰ হৈ পৰিছে । আনকি সকলো ছাত্ৰীলৈ আয়ত্ৰীৰ আহ্বান । যি সময়ত দেশত বেটি বচাও বেটি পঢ়াওৰ দৰে আঁচনিৰ জৰিয়তে চৰকাৰকে ৰাইজক কন্যা সন্তানৰ সজাগতাৰ বাবে ব্যৱস্থা গ্ৰহণ কৰিছে । তেনে সময়ত এখন ভিতৰুৱা গাঁৱত এগৰাকী দশমমানৰ ছাত্ৰীয়ে এনেদৰে ট্ৰেক্টৰ চলাই কৃষি কৰ্মত পিতৃক সহায় কৰা ঘটনাই এক বিশেষ চৰ্চা লাভ কৰিছে ।
লগতে পঢ়ক: কাৰ্বি আংলঙ স্বায়ত্তশাসিত পৰিষদৰ ৭০ সংখ্যক প্ৰতিষ্ঠা দিৱস উদযাপন
