কথাৰে নহয় বন্ধু, কামেৰেহে পৰিচয়, স্বাৱলম্বিতাৰ পথেৰে আগুৱাইছে এজন যুৱ অসমীয়া

ৰাজ্যৰ প্ৰান্তে প্ৰান্তে আৰম্ভ হৈছে স্বাৱলম্বিতাৰ যুঁজ । চৰকাৰী চাকৰিলৈ ৰৈ নাথাকি বহুজনে লাগিচে হাতে কামে । তেনে এজন উদ্যমী লোকে দৃষ্টি আকৰ্ষণ কৰিছে সকলোৰে । ডিব্ৰুগড়ত বহুল চৰ্চিত এই ব্যক্তিগৰাকী কোন, কেনেকৈ আগবাঢ়িছে স্বাৱলম্বিতাৰ পথত ? চাওক এই প্ৰতিবেদন ।

ডিব্ৰুগড়,২২ নৱেম্বৰ: মন কৰিলেই চন, বাকৰি মাটিতে ধন । চৰকাৰী চাকৰিনো কেলৈ লাগিছে ? স্বাৱলম্বিতাৰ সম্বল ঘৰতে আছে । চাকৰিৰ পাছত দৌৰাৰ প্ৰৱণতা যেন লাহে লাহে হ্ৰাস পাইছে । গঢ়ি উঠিছে থলুৱা উদ্যোগ । ৰাজ্য চৰকাৰেও থলুৱা উদ্যোগ স্থাপন কৰি যুৱক-যুৱতীসকলক উৎপাদনমুখী হ'বলৈ জনাই আহিছে আহ্বান । ইতিমধ্যে ৰাজ্য চৰকাৰে ৰাজ্যত কৰ্ম সংস্কৃতি গঢ়িবৰ বাবে ৰূপায়ণ কৰিছে কেইবাখনো অভিলাষী আঁচনি । কিছু সংখ্যক লোকে চৰকাৰী চাকৰিৰ প্ৰতি আকৰ্ষিত নহৈ নিজে কিবা এটা কৰাৰ লগতে আন দহ জনক সংস্থাপন দিয়াৰ বাবে চেষ্টা কৰিছ। যাৰ ফলস্বৰূপে ৰাজ্যখনত কৰ্ম-সংস্কৃতিৰ এক নতুন পৰিৱেশ দেখিবলৈ পোৱা গৈছে ।

তেনে এজন থলুৱা উদ্যোগী হ'ল ডিব্ৰুগড় মোহনবাৰীৰ হাৰাবাৰী অঞ্চলৰ মণ্টু শইকীয়া । কাঠফুলা খেতিৰ জৰিয়তে গঢ়িছে কৃষি অৰ্থনীতি বিপ্লৱ । এই গৰাকী উদ্যমী ব্যক্তিয়ে কাঠফুলা খেতিৰ জৰিয়তে কৃষি অৰ্থনীতি বিপ্লৱ সূচনা কৰিছে । লগতে বিজ্ঞানসন্মতভাৱে কাঠফুলা খেতি কৰি স্বাৱলম্বিতাৰ অন্যতম নিদৰ্শন দাঙি ধৰাৰ লগতে কেইবাজনৰো সংস্থাপনৰ বাট মোকলাই দিছে । বিগত ২৫ বছৰ ধৰি মণ্টু শইকীয়াই মোহনবাৰীৰ হাৰাবাৰীত নিজে কাঠফুলা খেতি কৰাৰ লগতে লাহোৱালৰ কেইবাটাও অঞ্চলত উন্নতমানৰ কাঠফুলা খেতি কৰাৰ বাবে বহুজনকে ব্যৱস্থা কৰি দিছে ।