টিংখাং, 6 জানুৱাৰী: মাজত মাত্ৰ কেইটামান দিন ৷ সমাগত অসমীয়াৰ হেপাহৰ ভোগালী বিহু, ৰাজ্যজুৰি প্ৰস্তুতি তুংগত ৷ বিহুৰ প্ৰাকক্ষণত ব্যস্ততা বাঢ়িছে টিংখাঙৰ এগৰাকী লোকৰ ৷ টিংখাঙৰ অন্তৰ্গত লেৰেলাপথাৰ গাঁৱৰ জিতেন কাকতি নামৰ লোকজলে সাজি উলিয়াইছে এটা বিশেষ ঢেঁকী ৷ আধুনিকতাৰ ধামখুমীয়াত অসমীয়া চহা জীৱনৰ পৰা হেৰাই যোৱাৰ উপক্ৰম হোৱা এই আপুৰুগীয়া সম্পদৰ পূৰ্বৰ জনপ্ৰিয়তা ঘুৰাই অনাৰ প্ৰয়াস কৰিছে এইগৰাকী লোকে ৷ নিজৰ একক প্ৰচেষ্টাৰে সাজি উলিওৱা আধুনিক ঢেঁকীটো আকাৰত সৰু ৷ এই ঢেঁকীৰ বাবে আপুনি পাতিব নালাগে ঢেঁকীশাল ৷ ঢেঁকীটোৰ লগতে সংলগ্ন হৈ থাকে খুবলিও ৷ ইচ্ছানুযায়ী আপুনি স্থানান্তৰ কৰিব পাৰে ঢেঁকীটো ৷ লগতে অতি কম ওজনৰ এই ঢেঁকীত 20 মিনিটতে খুন্দি শেষ কৰিব পাৰি 2 কেজিতকৈয়ো অধিক চাউল ৷
২০১৫ চনতে এই আধুনিক ঢেঁকীক J.K Udyog নামেৰে চৰকাৰী পঞ্জীয়ন কৰি জিতেন কাকতীয়ে বিক্ৰী কৰি আহিছে ৷ শিলিখা কাঠেৰে নিৰ্মিত এই আধুনিক ঢেঁকীটোৰ মূল্য ৬০০০ টকা ৷ অসমৰ বিভিন্ন প্ৰান্তৰ লগতে বহিৰাজ্যতো ঢেঁকী বিক্ৰী কৰিছে কাকতিয়ে ৷ নিজৰ বাসগৃহতে গঢ়ি তোলা ঢেঁকীৰ উদ্যোগটোৰে স্বাৱলম্বী হোৱাৰ লগতে নিজৰ চাৰিজনীয়া পৰিয়ালটোও সুন্দৰকৈ চলাই আছে জিতেন কাকতিয়ে ৷
লগতে পঢ়ক: অকৰ্মণ্য অসম ক্ৰীড়া সংস্থাঃ লজ্জানত অসমবাসী
