মৰাণৰ বিদ্যালয়ে উদঙাইছে শিক্ষা বিভাগৰ উন্নয়নৰ ছবি

মৰাণৰ এখন বিদ্যালয়ৰ তথৈবচ অৱস্থাই উদঙাইছে শিক্ষা বিভাগৰ উন্নয়নৰ ছবি ৷ উৱলি যোৱা শ্ৰেণীকোঠাৰ লগতে বৃহৎ ফুটা থকা টিনপাতৰ তলতে পাঠগ্ৰহণ কৰিবলগীয়া হৈছে মৰাণৰ সাৰুৱাছিগা উচ্চ মাধ্যমিক বিদ্যালয়ৰ ছাত্ৰ-ছাত্ৰীয়ে ৷

মৰাণ,4 মাৰ্চ: উৱলি যোৱা শ্ৰেণীকোঠাৰ লগতে টিনপাত নথকাৰ ফলত ৰ'দ-বৰষুণৰ মাজতে একপ্ৰকাৰ অস্বাস্থ্যকৰ পৰিৱেশত শিক্ষাগ্ৰহণ কৰিবলৈ বাধ্য হৈছে মৰাণৰ সাৰুৱাছিগা উচ্চ মাধ্যমিক বিদ্যলয়ৰ ছাত্ৰ-ছাত্ৰীয়ে ৷ বিদ্যালয়খনৰ তথৈবচ অৱস্থাই শিক্ষা বিভাগৰ উন্নয়নৰ প্ৰকৃত ছবিখনকে উদঙাই দিছে ৷ উত্থাপিত অভিযোগ অনুসৰি, অতি পুৰণি বিদ্যালয়খনৰ মূল গৃহটো উৱলি যোৱাৰ লগতে টিনসমূহো বতাহ-বৰষুণত নষ্ট হোৱাৰ ফলত ছাত্ৰ-ছাত্ৰীসকলে ৰ'দ-বৰষুণ একাকাৰ কৰি পাঠগ্ৰহণ কৰিবলগীয়া পৰিস্থিতিৰ উদ্ভৱ হৈছে ৷

বিদ্যালয়খনৰ শিক্ষকে জানিবলৈ দিয়ে যে, বিদ্যালয় গৃহটো মেৰামতি কৰাৰ বাবে শিক্ষা বিভাগক বাৰে বাৰে আবেদন জনোৱা হৈছে যদিও বিভাগৰ পৰা আজিকোপতি কোনো ধৰণৰ গুৰুত্ব লাভ কৰা নাই ৷ জৰাজীৰ্ণ বিদ্যালয় গৃহত শিক্ষাদান কৰাৰ ক্ষেত্ৰত নানান সমস্যাৰ সন্মুখীন হোৱা বিদ্যালয় কৰ্তৃপক্ষই সংবাদ মাধ্যমৰ জৰিয়তে গৃহটো মেৰামতি কৰাৰ বাবে আহ্বান জনাইছে চৰকাৰক ৷

লগতে পঢ়ক: ভালুকৰ সাঙিলৈ পৰিণত হৈছে টিংখাং মহাবিদ্যালয়ৰ গৱেষণাৰ সামগ্ৰী