মৰাণ, 9 নৱেম্বৰ : সৌন্দৰ্য চৰ্চাৰ জগতখনত খোজ দিয়েই শিশু মডেল ইস্পিতা দত্তই যথেষ্ট চৰ্চা আৰু আদৰ লাভ কৰিবলৈ সক্ষম হৈছে ৷ ডিব্ৰুগড়ৰ বাণীপুৰৰ নিবাসী ইস্পিতা দত্তই মহানগৰীত Spark ৰ দ্বাৰা আয়োজিত Spark Teens Miss North East India 2021 সৌন্দৰ্য প্ৰতিযোগিতাত শ্ৰেষ্ঠত্বৰ খিতাপ অৰ্জন কৰিবলৈ সক্ষম হৈছে ৷
ৰক্তিম দত্ত আৰু ৰিম্পী দত্তৰ একমাত্ৰ কন্যা ইস্পিতাই 2018 চনৰ ডিচেম্বৰত পোন প্ৰথমবাৰৰ বাবে সৌন্দৰ্য আৰু সাজপাৰ প্ৰতিযোগিতাত অংশ গ্ৰহণ কৰিছিল ৷ তাৰ পিছৰে পৰা থমকি ৰোৱা নাই ইস্পিতা ৷ গুৱাহাটী, শিৱসাগৰ, তিনিচুকীয়া আদিত অনুষ্ঠিত সদৌ অসম ভিত্তিক বিভিন্ন সৌন্দৰ্য আৰু সাজপাৰ প্ৰতিযোগিতাত অংশ গ্ৰহণ কৰি বহু খিতাপ অৰ্জন কৰিবলৈ সক্ষম হৈছে কণমানি মডেলগৰাকীয়ে ৷
পূৰ্বেও বিভিন্ন সৌন্দৰ্য প্ৰতিযোগিতাত শীৰ্ষস্থান লাভেৰে চমক সৃষ্টি কৰিছে সপ্তম শ্ৰেণীত অধ্যায়নৰত ইস্পিতাই ৷ গুৱাহাটীত হৈ যোৱা প্ৰতিযোগিতাখনত 200 গৰাকী প্ৰতিযোগীৰ মাজত শ্ৰেষ্ঠত্ব অৰ্জন কৰে ইস্পিতাই ৷
ডিব্ৰুগড়ৰ সম্পূৰ্ণ কেন্দ্ৰীয় বিদ্যালয়ৰ ছাত্ৰী গৰাকীয়ে কোনো ব্যক্তিগত প্ৰশিক্ষকৰ সহায় নোলোৱাকৈ এই কৃতিত্ব লাভ কৰাত উৎফুল্লিত হৈ পৰিছে পিতৃ-মাতৃ ৷ উল্লেখ্য যে, সৌন্দৰ্য জগতখনৰ আদিপাঠ ইস্পিতাই মাহীয়েকৰ পৰাই পাইছিল ৷
লগতে পঢ়ক : সুন্দৰী চিকিৎসক...পিছে কিহৰ বাবে আহিল চৰ্চালৈ
