ধুবুৰী,৩ জুন : কৰ'ণা আতংকৰ মাজতে বুধবাৰে মেঘালয়ত বৃহৎ পৰিমাণৰ অস্ত্ৰসহ তিনিজন যুৱকক গ্ৰেপ্তাৰ কৰে আৰক্ষীয়ে। মেঘালয়ৰ গাৰো পাহাৰ জিলাৰ পৰা আৰক্ষীয়ে গ্ৰেপ্তাৰ কৰে লোক কেইজনক । আৰক্ষীৰ অভিযানত আখিৰুল ইছলাম আৰু মজিদুৰ ইছলাম নামৰ লোক কেইজন আটক কৰাৰ পিছতেই সন্ধান ওলাই বিশাল অস্ত্ৰ ভাণ্ডাৰৰ। পৰৱৰ্তী সময়ত মেঘালয়ৰ নিদেনপুৰ আৰক্ষীয়ে অনুসন্ধান কৰি নুৰজামাল শ্বেখ নামৰ আন এজনক আটক কৰাৰ লগতে সেনাৰ পোছাক আৰু হস্ত নিৰ্মিত বন্দুক পুখুৰীৰ পানীৰ তলৰ পৰা উদ্বাৰ কৰিবলৈ সক্ষম হয় ।
স্থানীয় ৰাইজৰ পৰা জানিব পৰা মতে,অসমৰ সীমান্ত এলেকা দক্ষিণ শালমাৰা-মানকাচৰ জিলাৰ পৰা গুৱাহাটীলৈ যাতায়াত কৰা গাড়ী সমূহত ডকাইতিৰ লগতে অপহৰণ কাণ্ডত জড়িত আছে এইসকল অস্ত্ৰধাৰী যুৱক। বৰ্তমানেও মেঘালয় আৰক্ষীৰ তদন্ত অব্যাহত আছে ।
লগতে পঢ়ক : আৰক্ষীৰ প্ৰহাৰঃ মৃত্যুৰে যুঁজিছে গাঁওৰক্ষী বাহিনীৰ সম্পাদকে
