ধুবুৰী, 9 ছেপ্তেম্বৰ: ধুবুৰী জিলা কাৰাগৰৰ পৰা হঠাৎ এজন কাৰাবন্দী নিৰুদ্দেশ হোৱা ঘটনাই সৃষ্টি কৰিছে চাঞ্চল্যৰ। ধুবুৰী জিলাৰ গোলকগঞ্জ আৰক্ষী থানাত ৰুজু হোৱা 787/20 নম্বৰৰ এক চুৰি গোচৰৰ অভিযুক্ত হৈ গ্ৰেপ্তাৰ হৈছিল মনিৰ হুছেইন নামৰ এজন 18 বছৰীয়া যুৱক । গোলকগঞ্জ আৰক্ষীয়ে গ্ৰেপ্তাৰ কৰাৰ পিছত যোৱা 3 ছেপ্তেম্বৰৰ দিনা ধুবুৰী আদালতৰ জৰিয়তে জেল হাজোতলৈ প্ৰেৰণ কৰা হৈছিল অভিযুক্ত যুৱকজনক ।
ইপিনে কৰ’ণাতংক আৰু বানৰ বাবে ধুবুৰী জিলা কাৰাগাৰলৈ অহা নতুন কাৰাবন্দী সকলক ওচৰৰ ধুবুৰী ছোৱালী মহাবিদ্যালয়ত স্থানান্তৰ কৰা হৈছিল । সেইমতে মনিৰ হুছেইনক ৰখা হৈছিল ধুবুৰী ছোৱালী মহাবিদ্যালয়ৰ কাৰাগাৰত । কিন্তু বুধবাৰে পুৱাৰ ভাগত যুৱকজন কাৰাগাৰ ভিতৰৰ পৰাই নোহোৱাৰ পিছতেই হুৱা-দুৱাৰ সৃষ্টি হয় ।
অৱশেষত কাৰাগাৰ পৰা আচামীজন পলাই যোৱা বুলি নিশ্চিত হয় কাৰাগাৰ কৰ্তৃপক্ষ। অৱশ্যে এই বিষয়ে ধুবুৰী আৰক্ষী আৰু কাৰাগাৰ কৰ্তৃপক্ষই সংবাদ মাধ্যমৰ আগত মুখ খোলাৰ পৰা বিৰত আছে । লক্ষ্যণীয় বিষয় যে কাৰাগাৰৰ ভিতৰে বাহিৰে কটকটীয়া নিৰাপত্তা বেষ্টনী গঢ়ি তোলাৰ সময়তে আৰক্ষীৰ নিৰাপত্তাৰ বেহু ফালি কিদৰে পলাই যাবলৈ সক্ষম হ’ল । সেয়া এই মূহুৰ্তত ডাঙৰ প্ৰশ্ন । এই ঘটনাই কাৰাগাৰ কৰ্তৃপক্ষৰ নিৰাপত্তাৰ ফোঁপোলা স্বৰূপ উদঙাই দিছে ।
লগতে চাওক-বাংগালুৰু বিমান বন্দৰত জব্দ 1 কোটিতকৈও অধিক মূল্যৰ ড্ৰাগছ
