পূৱ বিলাসীপাৰা,18 জানুৱাৰী : "বিজেপিৰ কাৰণে কোনো ক্ষতিকাৰক নহয় ৰাইজৰ দল আৰু অসম জাতীয় পৰিষদৰ মিত্ৰতা ৷ ৰাইজৰ দল মানুহ নোহোৱা দল ৷ ৰাইজৰ দল আৰু অসম জাতীয় পৰিষদৰ ডাঙৰ ডাঙৰ নেতাৰ সভাত ৰাইজ উপস্থিত হয় মাথো তিনিশৰ পৰা চাৰিশ লোক " ৷ এই মন্তব্য অসম চৰকাৰৰ মন্ত্ৰী পীযুষ হাজৰিকাৰ ৷ সোমবাৰে পূৱ বিলাসীপাৰাৰ চাপৰ প্ৰগতি ভৱনত অনুষ্ঠিত হোৱা এখন সভাত উপস্থিত থাকি এই মন্তব্য কৰে মন্ত্ৰী গৰাকীয়ে ৷ লগতে ৰাইজৰ দল আৰু অসম জাতীয় পৰিষদ দলৰ মিত্ৰতালৈ শুভেচ্ছা জ্ঞাপন কৰিছে মন্ত্ৰী পীযুষ হাজৰিকাই ৷ উল্লেখ্য যে,উক্ত সভাত উপস্থিত থাকি বহুকেইখন আঁচনিৰ বিষয়ে ৰাইজক অৱগত কৰাৰ লগতে বহুকেইটা আধাৰশিলা স্থাপন কৰে মন্ত্ৰী গৰাকীয়ে ৷ লগতে মহিলা সবলীকৰণৰ বাবে আত্মসহায়ক গোট সমূহক 15 হাজাৰ টকাকৈ বিতৰণ কৰে মন্ত্ৰী গৰাকীয়ে ।
আনহাতে মিঞাৰ ভোট নালাগে বুলি কোৱা মন্ত্ৰী হিমন্ত বিশ্ব শৰ্মাৰ বিপৰীত স্থিতিত অৱস্থান কৰা দেখা গল মন্ত্ৰী পীযুষ হাজৰিকাক ৷ হাজৰিকাৰ মতে ভাৰতৰ সংস্কৃতিক ভালপোৱা আৰু অসমক ভাল পোৱা হিন্দু-মুছলমান সকলোৰে প্ৰয়োজন আছে বিজেপি দলক । লগতে সাম্প্ৰদায়িক মন্তব্য দি হিন্দু, মুছলমানক ভাগ ভাগ কৰা ব্যক্তিক ভোট নিদি কাম কৰা ব্যক্তিক ভোট দিয়ক বুলি ৰাইজলৈ আহ্বান জনাই মন্ত্ৰী পীযুষ হাজৰিকাই ৷ উক্ত সভাত উপস্থিত থাকে বিলাসীপাৰা পূৱ সমষ্টিৰ বিধায়ক অশোক কুমাৰ সিংঘী ৷ উক্ত সভাত বিজেপি বিধায়ক অশোক কুমাৰ সিংঘীৰ ৰিপৰ্ট কাৰ্ড প্ৰদান কৰি,পৰোক্ষভাৱে বিধায়ক গৰাকীৰ সপক্ষে ভোট দিবলৈ আহ্বান কৰিলে মন্ত্ৰী পীযুষ হাজৰিকাই ৷
লগতে পঢ়কঃ 2021 বৰ্ষৰ চূড়ান্ত ভোটাৰ তালিকা প্ৰকাশ কৰিলে তিতাবৰ মহকুমা প্ৰশাসনে
