বিলাসীপাৰাত ৰাইজৰ হাতত আটক অপহৰণকাৰী

শুকুৰবাৰে পুৱা 9 বজাত বিদ্যালয়লৈ যোৱাৰে পৰা নিৰুদ্দেশ হৈ আছিল নাবালিকাগৰাকী ৷ ৰাইজে অপহৰণকাৰীক আটক কৰি গতাই দিয়ে আৰক্ষীক ৷

বিলাসীপাৰা, 26 এপ্ৰিলঃ বিলাসীপাৰাৰ বেলতলীত শুকুৰবাৰে নিশা ৰাইজৰ হাতত আটক হয় এগৰাকী নৱম শ্ৰেণীৰ ছাত্ৰীৰ অপহৰণকাৰী ৷ বিলাসীপাৰাৰ লক্ষীগঞ্জৰ 15 বছৰীয়া নাৱালিকা তথা লক্ষীগঞ্জ উচ্চতৰ মাধ্যমিক বিদ্যালয়ৰ নৱম শ্ৰেণীৰ ছাত্ৰী গৰাকী শুকুৰবাৰে পুৱা 9 বজাত বিদ্যালয়লৈ যোৱাৰে পৰা নিৰুদ্দেশ হৈ আছিল |

শুকুৰবাৰে নিশা ছাত্ৰী গৰাকীক এজন বিবাহিত যুৱকে অপহৰণ কৰি গুৱাহাটী লৈ নিয়াৰ উদ্দেশ্যেৰে বেলতলীত উপস্থিত হয় ৷ যুৱকজনৰ চাল চলনত সন্দেহ ওপজাত স্থানীয় লোকে সোধ পোছ কৰাত ঘটনা পোহৰলৈ আহে ৷ পৰৱৰ্তী সময়ত ছাত্ৰীগৰাকীসহ অপহৰণকাৰী যুৱক জনক বিলাসীপাৰা আৰক্ষীক গতাই দিয়ে ৷ আৰক্ষীৰ তদন্তত অপহৰণকাৰী যুৱকজন ছাহাজুল হক বুলি পৰিচয় জানিব পৰা গৈছে ৷ ছাহাজুলৰ ঘৰ গোলকগঞ্জৰ পাগলাহাটত ৷